Inuiaqatigiinni akiitsunikkiartorneq Palle Christiansenip mianersoqqussutigaa

Inuiaqatigiit tamarmik 6,5 milliardi koruunit missaannik akitsoqarput. Taakkunannga Namminesorlutik Oqartussat suliffeqarfiussuisa 4 milliardi koruunit akiitsoraat, sinnerilu illuliortiternermut inissiliartiternermullu atatillugu akiitsuullutik.

Akiitsut amerliartorneri Palle Christiansenip isornartoqarteqaa. Tikkuarpaa, akiitsunikkiartorneq inuiaqatigiit aningaasaqarnerannut ulorianartorsiortitsisinnaasoq. Aappaatigulli aamma oqaatigaa, akiitsunikkiartorneq iluaqutitaqarsinnaasoq

- Inuiaqatigiinnut iluaqutaasussaasut takusinnaagutsigu aningaasalersuissaagut. Aamma suliffeqarfiutitta aningaasanik atorniarnissaat akuersaassavarput, atorniarnikkut ingerlatsineq akikinnerulissappat suliffeqarfiilluunniit niuernerannut iluaqutaassappat.

Kisianni akiitsut allat taarsersorniarlugit atorniartoqassappat ajortoqarsimassaaq, taavalu oqaloqatigisariaqassavagut. Aamma imminut akilersinnaanngitsumik ingerlatsineq aningaasalersorniarlugu atorniartoqarpat, tamanna unitsinneqartariaqarpoq, Palle Christiansen oqarpoq.

Taassuma atugarissaarnerup isumagininnermik annertussaaffiiusumik ilinniartitaanerullu pitsanngorsarneranik ingerlatseqqiffiusumi ineriartorteqqinnisaa pingaartippaa.

- Aningaasaliissutaasartut allanngortiternerisigut imminullu akilersinnaanngitsumik ingerlatsiffiusunut tapiissutit sipaarfiginerisigut tamanna anguneqarsinnaasoq, uagut isumaqarpugut. Taamaaliorutta angusaqangaatsiassaagut. Taava ukiut ingerlanerini ilinniartitagut suliffinni - immaqa akitsornikkut pilersitatsinni - sulilissapput. Kisianni suliffiit taakkua pilersinneqartut naammassisaqarfiusariaqarput, imaanngitsoq qallunaat oqartarnerattut imminnut nujaajartarfiusssasut, aningaasaqarnermut naalakkersuisoq Palle Christiansen oqarpoq.

Innuttaasut pisortanut akiitsui maanna milliardi koruuniusut, aamma aningasaqarnikkut ingerlatsineq pillugu nassuiaammi atuarneqarsinnaavoq.