Inuialuit nunaanni takornariaqarneq siuarsarneqalerpoq
Canadap issittortaani aamma avannarpasinnerusortaani takornariaqarnerup ineriartortinneqarnissaa aningaasarsiornikkut pingaaruteqartuusoq Canadami naalakkersuisut ilisimagaat, Leona Aglukkaq, Canadap avannarpasinnerusortaani aningaasarsiornikkut ineriartornissaq pillugu naalakkersuisuusoq oqarpoq.
Inuivialummi innuttaasut niuernikkut suliariaatsinik nutaanik inertortitsinissaannik suliniuteqartoqarpoq, takornariat amerlanerusut soqutigisinnaasaannik iluaqutaasussanik.
- Aningaasaliissutigineqartut Inuialuit nunaanni takornariat piumasaannik soqutigisaannillu missisuisoqassaaq, aamma sanalukkanik tuniniaanerup ineriartortinneqarnissaa aningaasaliiffigineqassaaq, Canadami suliffissuaqarnikkut takornariaqarnikkullu ministeri Bob McLeod oqarpoq.
Inuialuit nunaanni takornarianik suliaqartut pilerisaarutinillu suliallit pikkorissartinneqarnissaannut naalakkersuisut aamma aningaasaliissapput.
Nunani allani aningaasarsiornikkut kinguariarneq Canadamut annertuumik sunniuteqanngilaq, taamaattumik nutaanik ineriartortitsinissamut periarfissaqarluarluni.
Canadami aningaasarsiornikkut inissisimaneq pissutaalluni, Canadamiut amerlanerit sulinngiffeqarlutik Canadami feriartarput, USA-liaratik Europaliaratillunniit.
Nunanit allamiorpassuit Inuialuit nunaannut takornariartartut amerligaluttuinnarput, takornariat tassaapput siornatigut takusimanngisaminnik akiminnullu naleqquttunik misigissassarsioriartut.
