Inuartoq suli tigusarineqanngilaq
- Ataatagali ukiut tallimat matuma siorna toqutaammat politiit toqutsinermut tunngatillugu misissuinerat apeqqusertuarsimavara, Severine Serubabelsen oqaluttuarpoq. Taassuma ataatani Jens Peter Berthelsen februaarip 24-ani 2007-mi annaavaa, Nuummi inissiat ilaanni ulloq taanna toqusimasoq siumorneqarmat.
Politiit toqutsisoqarsimasinnaaranik paasiniaanerminnut atatillugu ikioqqullutik ullut qulit missaanni qaangiutereersut assinganik innuttaasunut takutitsillutik saaffiginnipput – kinguneqanngitsumilli.
- Soorluuna politiit ataatannut tunngasumik paasiniaanerminni salliutitsiniarsimanngitsut imaluunniit salliutitsinianngitsut; taama pinerpat ataataga angerlarsimaffeqartuusimanngimmat, imerajuttuusimammat aalajangersimasumillu suliffeqanngitsuusimammat, Severine Serubabelsen aperivoq.
- Aamma paasisinnaanngilara politiit paasiniaanertik maannakkut unitsikkallarsimammassuk. Nuummimi imaluunniit nunatsinniittoqarpoq inummik toqutsisimasumik, tamannalu toqqissisimanartinngitsorujussuuara. Taassumammi inuk kinaluunniit pinngitsuusoq toqusinnaavaa, Severine Serubabelsen, kina ataataminut toqutsisuusimanersoq pillugu eqqarsaateqartuartartoq, oqarpoq.
Ataatami inuuffia toqutaaffialu qalligaangata aliasuttarpoq.
- Aatsaat eqqissilersinnaavunga ataatannik toqutsisoq paasineqarpat eqqartuunneqarpallu – naapertuilluartumik suliaq naammassineqarpat, Severine Serubabelsen oqarpoq.
KNR.gl Nuummut poliliinut aperivoq Jens Peter Berthelsenimik toqutsisoqarsimasinnaaneranik paasisaqartoqarsimanersoq. Akissutaagallartorli tassaavoq: Suliamut tunngatillugu suli paasinnittoqanngilaq, paasiniaanerlu unitsinneqarallarsimavoq, qularnaavissortumillu toqutsisimasinnaasumik ilisimannittoqarani.
