Interpolimi pisortaasimasoq Kinami parnaarussassanngortitaasoq

Kinamiu, nunani tamalaani politiit suleqatigiiffianni Interpolimi pisortaasimasoq, Meng Hongwei, 14 millionit koruuninik akilerneqarluni peqquserlutsinneqarsimasutut Kinami ukiuni 13-ini qaammatinilu arfinilinni paarnaarussassanngortitaavoq.

Kinami eqqartuussivik taama ilisimatitsivoq.

Interpolimi pisortaasimasoq Kinamut 2018-imi angalareernermi kingorna Interpolip Frankrigimi qullersaqarfianut utimut apuutinngimmat periarfeerunneqarpoq.

Meng peqquserlussimasutut pasillerneqarnini pissutigalugu nunagisamini tigummigallaagaasoq, kingusinnerusukkut nalunaarutigineqarpoq. Tamatuma kingorna nunani tamalaani politiit suleqatigiiffianni pisortatut tunuarsimasoq, Interpolip nalunaarutigaa.

Akilerneqarluni peqquserlutsinneqarsimasutut nassuertoq

Kinap Meng Hongwei kommunistit partiiannit siorna anisillugulu eqqartuussivimmi suliassanngortippaa, Meng Hongweilu 14 millionit koruuninik akilerneqarluni peqquserlutsinneqarsimasutut juulip qaammataani siullermik eqqartuussaanermini nassuerpoq.

Meng Hongwei Interpolimi pisortanngunnginnermini Kinap sillimaniarnermut ministerianut tullersortaavoq. Peqqissimininilu Kinap kangisissortaata eqqartuussiviani takutissimagini, kommunistit partiiata tusarliisartuata, Folkets Dagbladip, allaaseraa.

Meng Hongwei kommunistit partiiannit marsip qaammataani anisitaavoq. Meng Hongweilu kommunistit partiianni ilaasortat amerliartuinnartut - Kinap præsidentiata, Xi Jinpingip, peqquserlulluni iluanaarniarnermut akiuineranit eqqugaasut - ilagaat.

Xi Jinpingip peqquserlulluni iluanaarniarnermut akiuinera politikkikkut akerliusunik isornartorsiuisartunillu peersitsiniaanerigaa, isornartorsiuisartut oqaatigaat.

Meng Hongweip nuliata uini akilerneqarluni peqquserlutsinneqarsimasuunnginnerarpaa. Nulia qimaasutut Frankrigimi akuerisaavoq. Nuliatalu qitornanilu marluk Frankrigimiit aallarunneqarnissartik annilaangatiginerarpaa.