Internetsimik atuivallaat killilerneqarsinnaanngorput
- Imaatigut kabelip atulernerata kingorna, internetimik atuineq sukkanerulermat, internetimi videunik isiginnaarneq pinnguaatinilluunniit atuineq pilerigineqarnerulerput, ilaqutariillu ilarpassui internetimik atuinerminnut naatsorsuutigisaminnit annerusumik akiligassinneqartalerput, Telep pisortaa Anders Barslund oqarpoq.
Taamaattumik TELE-p atuisunut isertarfittaava aqqutigalugu interneternermi qaammammut megabytet qassit atorumanerlugit nalunaarutigineqarsinnaanngorput. Atuisut taamaalillutik akiligassatik amerlinnginnerini killilersinnaanngussavaat.
Atuinissamut killiliussaq angugaanni, SMS-ikkut imaluunniit e-mailikkut nalunaarfigineqarnissaq kissaatigineqarsinnaavoq. Tamatumalu kingorna isertarfimmi killigititaq kissaatigigaanni qaffanneqarsinnaasoq, Tele tusagassiuutinut nalunaarummini allappoq.
Periarfissaq nutaaq taanna Telep nittartagaani nanineqarsinnaavoq, atuisunullu akeqanngitsoq, Tele nalunaarpoq.