Internetikkut pisiat akisunerusinnaapput
- Umiarsuakkut assartuussinermi akit nioqqutissat akiinut ilaatinneqartassapput, ukiulli ilaani sikusarnera eqqarsaatigalugu Royal Arctic Linep umiarsuaatai najugaqarfiit ilaannut anngussinnaaneq ajorput. Taamaalisoqaraangat silannaakkut assartuussisoqarsinnaasassaaq, nioqqutissallu taamaalinikkut akisunerulersinnaallutik, KNI-mi pisortaanerugallartoq Lars Møller Sørensen oqarpoq.
Nunaqarfiit inukilliartorneranni nioqqutissat ikilisinneqarnissaat pisariaqartoq oqaatigineqarpoq.
Interneti atorlugu pisiniarsinnaaneq pisisa.gl-imik taaguuteqassaaq, nioqqutissallu pisiarineqarsinnaasut tassaassapput qerititsiviit, isiginnaarutit, piniarnermullu atortut assigisaallu.
Naak Pilersuisup pisiniarfiutaanit internetikkut pisiniarsinnaalernissaq nioqqutissat akisunerulersinnaanerannik kinguneqarsinnaagaluartoq, KNI-mi pisortaanerugallartoq isumaqarpoq taamatut aaqqissuussinissaq iluaqutissartaqartoq:
- Taamatut aaqqissuussiniarneq ataatsimut isigissagaanni eqqarsartoqarsinnaavoq immaqa iluaqutissaqanngitsoq, akerlianilli isumaqarpunga, iluaqutissartaqarnerusormi isumaqarama, KNI-mi pisortaanerugallartoq Lars Møller Sørensen KNR-imut oqarpoq.
Pilersuisup pisiniarfii ataasiakkaat tamarmik immikkut ataatsimiititaliaqalissapput, Lars Møller Sørensenillu oqarnera naapertorlugu tamanna iluaqutissanut ilaavoq, ataatsimiititaliammi taakku pisiniarfimmi pisiarineqarsinnaasussat suussanersut aalajangeeqataaffigisinnaassammassuk.
Kiffartuussinissamik isumaqatigiissut nutaaq Namminersorlutik Oqartussani maanna nalilersorneqaleruttorpoq, kiffartuussinissamullu isumaqatigiissut maanna atuuttoq marsip naanissaata tungaanut taamaammat sivitsorneqarpoq.