Internet akikinnerusoq qanilliallappoq

TELE Greenlandip ataatsiimeersuarnerani, ippassaq ingerlanneqartumi, pisortaagallartup Steen Montgomery-Andersenip suliffeqarfiup naatsorsuutai saqqummiummagit, taakkunani takuneqarsinnaavoq, Tele Greenland akileraarutit ilanngaatiginagit 71 millioner koruninik sinneqartooruteqartoq aamma Namminersorlutik Oqartussat 32 millioner koruuninik iluanaaruteqassasut.
Allattoq Jaaku Lyberth
maajip 03-at 2012 06:26

Sinneqartooruteqarnermi internet-ip sukkatsinnerunissaa nalunaarutigineqarpoq.

Ataatsimeersuarneq sioqqullugu, TELE Greenland oqartussaasunit akuerineqarpoq internet-imi atortorissaarutit sukkatsinneqarnissaannut, taakkununnga ilanngullugit internet-imut attaveqaatit mobil-ikkoortut aamma tunisassiani ADSL-imi atortut.

TELE Greenland atortutigut inerisaanermini illoqarfiit arfinillit internetip attaveqaataanik mobil-ikkoortumik atortulersorniarpiai.

TELE Greenlandip aningaasaliiffiginiagai allat tassaapput, allakkerivinni nammineerluni sullivinnik nutaanik pilersitsinissaq, Tele Greenland tusagassiuutinut nalunaruteqarluni taamatut allappoq.
Telep aningaasatigut angusarissaarnera naalakkersuisunit isumalluarfigineqarpoq.

Tele Greenlandip atortorissaarummik DVB-T-mik aamma, illoqarfiit nunaqarfiillu tamarmik 2012-ip naanerani digital TV-mik peqalernissaat anguniarpaa.

Taakkua saniatigut Nunaqarfinni radiokædip annertusinissaa, nunaqarfiit kingulliit, ingammik Tunumiittut, 2012-i naatinnagu alisissumit ilinniartitsinermik telemedicinimillu pitsaanerusunik atugassaqartitaalernissaat anguniarneqarput.

Taakkua saniatigut Naalakkersuisut naatsorsuutigaat angusap pitsaasup atuisunut akikinnerusumik interneteqalernermik kinguneqarnissaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq