Internet akikilleqqilerpoq
Goldimik atuinissamik pisissartut ullumikkut 599 koruuninik akiliuteqarlutik 3 GB pissarsiarisarpaat, siunissamili akiliut taanna allanngortinngikkaluarlugu 9 GB pissarsiarisinnaalissavaat. Premiumimik atuisut akiliumminnut 9 GB pissarsiarisarpaat siunissamilu 20 GB pissarsiarsinnaalissavaat. Nuummi unammillertoqalerneratigut arlaannik pisoqarnissaanik Tele Postimi pisortaagallartoq Steen Montgomery-Andersen neriorsuereersoq taama pisoqarpoq.
- Mobil atorlugu internetimut akigitinneqartut qanittukkut appartinneqarput. Maanna qinnutigaarput bredbåndimik atuinermi atorneqarnerpaat marluk akikillinissaat. Suliassattami pingaarnersaattut isigaarput inuiaqatigiinni tamani akikinnerusumik pitsaanerusumillu internetimik atuilernissaq, tele-min pisortaq Anders Barslund tusagassiutinut nalunaarummi allappoq.
Maanna tassa attaveqarnermut aqutsisoqarfiup isummerfigisussanngorpaa internetimik atuisut juulli sioqqullugu akikillisaavigineqassanersut. Suliaq maanna aallartereerpoq.
Attaveqarnermut aqutsisoqarfik arlaleriarluta oqaaseqartinniarsimagaluarparput iluatsinnaguli. Paaserusussimagaluarparput sullissinerit pineqartut marluk akikillinissaat qaqugu pisinnaassanersoq.
KNR.gl-mi Ib Uldum Glindorf siusinnerusukkut isornartorsiuivoq Nuup avataani internetimik atuisut Tele Postimi suusupagineqartut unnerlugit. Tamannali aamma pitsanngoriaatissaqartinneqarpoq.
- Iluarisimaarnarpoq nunarput tamarmi isiginiarneqarmat. Qaammatit kingulliit Tele Postip sullissinerata pitsanngoriarnera malunnarpoq. Qeqertarsuarmi 4 megabitsimik attaveqalernissamik neriorsuutsik eqquutsippaat maannalu tassa atorneqarsinnaasoq marloriaatinngortinniarpaat. Taamaammat atuisut matumani iluaquserneqartussanngorput, Ib Uldum Glindorf oqarpoq.
