Inoqutigiit 50-it anisitaalersut

Maniitsumi innuttaasut tassaapput nunatsinni inissiaateqarfimmut A/S Ini-mut akiitsoqarnerpaasut. A/S Ini-mut akiitsut katillugit maanna 2,3 millionit koruuniupput.

Tamanna inoqutigiinnut 50-inut inigisamit anisitaanermik kinguneqartussanngorpoq.

- Pilersaarutaavoq februarip 16-iani inoqutigiit tallimat anisitaanissaat. Akiitsullillu tamarmik ataatsikkut anisitaannginnerannut pissutaavoq anisitaasussanngortut tamaasa inisseqqinnissaannut periarfissaqannginnatta, taama Qanoruumut oqarpoq A/S Ini-mi tusagassiisartoq Christine Stampe Frøsig.

Inoqutigiit anisitaasussanngortut naafferaallutik akilersuinissamut periarfissaarutereerput akileequsissutit qisuariarfigisarsimannginnamikkit. Inigisartik pigiinnassagunikku periarfissatuarilerpaat akiitsut tamaasa ataatsikkut akilernissaat.

Tamannali amerlanernut ajornavissinnaavoq tassami akiitsut 3.700 koruuniniit 48.000 koruunit tikillugit amerlassuseqarmata.

Sulinermik inuussutissarsiutillit kattuffianni SIK-mi siulittaasoq Jess G. Berthelsen quarsaarsimavoq inoqutigiit taama amerlatigisut anisitaasussanngormata.

Taassuma tupigusuutigaa politikkikkut akisussaasut siusinnerusukkut qisuariarsimanngimmata Maniitsoq sivisuumik suliffissaaleqiffioreersimammat.

- Qinikkanit akisussaasunit tunniutiinnarneruvoq qanoq iliuuseqarani isiginngitsuusaaginnarsimagaanni ilaqutariit 50-it inuiaqatigiinnit annerusumik iliuuseqarfigineqaratik silamut issittumut anisiinnarneqassappata. Ajoraluartumillumi toqqissisimananngilluinnarpoq inuttullu akuerineqarsinnaanngilluinnarluni nunami qanga inuiattut ilaqutariittullu immitsinnut ikioqatigiittuarluta inuuffigisimasatsinni, taama Jess G. Berthelsen oqarpoq.

Qanoruumi ilanngutassiaq takoqqissinnaavat ataatungaani linki toorlugu.