Inoqarfeeqqat ataatsimeersuassutigineqalersut

Ataatsimeersuarneq, Kommuninut, Isorliunerusunut, Attaveqaqatigiinnermut Ineqarnermullu Naalakkersuisoqarfimmit aaqqissuunneqartoq, Naalakkersuisumit Erik Jensenimit pisortatigoortumik ullumi nalunaaqutaq ullaakkut qulingiluanut ammarneqassaaq.

Tamatuma kingorna Inuussutissarsiornermut, Suliffeqarnermut, Niuernermut, Nukissiuuteqarnermut Naalakkersuisoq, Hans Enoksen, aamma Kalaallit Nunaanni Nunaqarfiit Peqatigiiffianni, KANUNUPE-mi, siulittaasoq Jens Kristian Therkelsen ammaanersiornermi oqaaseqassapput.

Namminersorlutik Oqartussat tusagassuutinut taama nalunaaruteqarput.

Ataatsimeersuarnermi oqaluuserineqartussat pingasunut agguataarneqarput.

Siulleq tassaavoq ”Siunissami nunaqarfiit inoqarfiillu minnerusut”, tamannalu sammineqarnerani Naalakkersuisut siulittaasuat Kim Kielsen avatangiisinut tunngassuteqartut pillugit oqalugiaateqassaaq.

Inuussutissarsiornermik, pilersuinermik namminersortullu suliffiutaasa ineriartornissaannik periarfissagissaartitsinissaq tullinnguullugu sammineqassaaq. Tamanna sammineqarnerani Center for Arktisk Teknologimit KNI A/S-imillu saqqummiunneqartut aallaavigalugit oqallittoqassaaq.

Qulequttat pingajuat tassaavoq meeqqat inuusuttullu inuuniarnikkut atugaasa toqqissisimanartuullutillu ineriartorfigiuminartuunissaat, taannalu ataatsimeersuarneq pingasunngornermi nanginneqarpat sammineqassaaq, isumaginninnermullu naalakkersuisoq Sara Olsvig isumaginninnikkut nunaqarfinni suliniutit pillugit oqalugiaateqassalluni.

Ataatsimeersuarnermi peqataasut oqallitsinneqareerunik innersuussutissanik saqqummiussaqartinneqartussaapput.