Innuttaasut 5.000-ngajaat MitID amigaatigaat - Timotheus Petersen taakkununnga ilaavoq
Aningaaseriviit tamarmik piumaffigineqarput oktobarip 31-iani NemID atorunnaarsereerneqassasoq, tamaanna aamma Grønlandsbankenimut tunngavoq.
Tamannalu Timotheus Petersen-imut Kullorsuarmeersumut ajornartorsiutinnguussimavoq, taannami piffissami sivisuumi NemID-miit MitID-mut nuunniarsarigaluarpoq - maannamulli suli iluatsinngitsumik:
- Allanik nalunnginnittunik ikiortilerlunga aamma iserfiginiarsarisaqattaaraluarlugu, naggataatigut pas-i aporfinngortarami, passeqarnangalu uanga. Taava naggataatigut ajornartuuvikkama, Avannaata Kommunianut sullissivimmut Ilulissanut saaffiginnippunga allat ikiorneqartartut paasileriarakku.
Timotheus Petersen umiatsiamini. Asseq: Nammineq pigisaq.
- Kisianni aamma tassani itigarpunga tunngavilersuutigineqarluni kommunimiinngooq kukkullutik ikiuuttarsimagamik ikiuuteqqissinnaanngitsut, taanna oqaluttuarpoq. Siunnersorneqarpunga Upernaviliarsinnaasunga kinaassutsinnik uppernarsaatit pisariaqartinneqartut pissarsiarisinnaaniassagakkit.
Tamanna isumaqarpoq, Timotheus Petersen Kullorsuarminngaaniit Upernavimmut uterlugulu imaatigut angalasariaqalerneranik - angalaneq 400 km-mit isorartunerusoq siumut utimullu angalaavigalugu.
Tassami Timotheus Petersen-ip oktoobari naatinnagu angumererusuppaa NemID-miit MitID-mut ikaarsaareernissani, taamaanngippat novemberip aallaqqaataaniit nammineq aningaasaatinik aqutsisinnaaneq ajornartorujussuanngussammat.
Nunaqarfiit peqatigiiffiata siulittaasuat: Ikiortigut!
Pissutsit taamaammata Nunaqarfiit Peqatigiiffianni KANUNUPE-mi siulittaasoq, Karl Petersen piumasaqarpoq NemID-miit MitID-mut ikaarsaarneq ajornaannerulersinneqassasoq piaartumillu ikiorsiisoqassasoq, pingaartumik utoqqaat pitsorluttullu eqqarsaatigalugit:
- Sullissivimmut saaffiginnikkaangatta, tamatigut uteqattaartarpaat kinaassutsimut uppernarsaat imaluunniit biilernermut allagartaq, taakkulu piginngikkutsigit sullinneqarnerput pisinnaanngitsoq, assorsuaq erloqinarpoq!, taanna oqarpoq.
Grønlandsbanken iliuusissaaleqisunut paasinnilluarpoq
Karl Petersen-ip ernumanera Grønlandsbankenip Aqutsisoqarfimmi pisortaata Carsten Th. Pedersen-ip paasilluarsinnaanerarpaa:
- Ajornartorsiuteqarpugut. Aamma suliaq aallartinneqalermat ajornartorsiutaalersussatut siumoortumik takoreersinnaasagut ajoraluartumik ullumikkut killiffitsinni ilumoortuusut uppernarsivarput. Atuisartugut MitID-mut ikaarsaanngitsut suli amerlapput, tassa 4.900-it missaannik amerlassuseqarput, taakkunanngalu nunaqarfinniittut illoqarfinnilu avinngarusimasuniittut affaasa missaraat, Carsten Th. Pedersen KNR-imut nassuiaavoq.
AAMMA ATUARUK Grønlandsbanken: Myndighederne hjælper ikke nok til med MitID
Taassuma aamma nunatsinni kommunit suli akuersissutaateqanngitsut kaammattorpai piaartumik akuersissummik pissarsiniaqqullugit, taamaalillutik MitID-mik innuttaasunut tunniussisinnaalerniassammata. Tassami nunatsinni Kommunit, Grønlandsbanken allallu bankit assigalugit innuttaasunut MitID-mik peqalersitsisinnaanissaminnut akuersissummik peqaqqaartussaammata.
Manna tikillugu Kommuneqarfik Sermersooq kisimi akuersissummik pissarsisimavoq. Taamaalillutik Kommunemi innuttaasut pisariitsumik MitID pissarsiaralugulu atulersinnaalernikuuvaat.
