Grønlandsbanken: Pisortat sullissivii MitID-taarniartunut tamakkiisumik ikiuutinngillat
Suna tamarmi digitalinngoraluttuinnarpoq. Pisortat innuttaasunut allakkanik pappialaasunik aamma nassiussisarunnaarput. Taarsiullugu allagarsianik tigooraavikkut digitaliusukkut, e-Box-ikkut, kinaassutsimut upernarsaat digitaliusoq, MitID, iluaqutigalugu atuarneqassapput.
Tamannali attataasap tuuinnarneratigut pisinnaanngilaq. Immersugassammi assigiinngitsut immersoqqaagassaapput. Tamannalu pisortat, tassa inoqarfinni innuttaasunut sullissiviit, Digitalimillu Sullissinermut Aqutsisoqarfiup naammattumik suliarisimanngikkaat, aningaaserivimmit isornartorsiutigineqarpoq.
- Grønlandsbankenilli ilisimavaa kommunini Sullissivinnilu atuisut ikiornissaannut piareersimanngitsut, Helle Mark, aningaaserivimmi MitID pillugu ikiuisartoq, KNR-mut oqarpoq.
Aningaaserivik: Kisittaannangajak sullissivugut
Tassa imaappoq, aningaaseriviup pisortat suliassaat, tassa innuttaasut kiffartuunnissaat suliarisariaqartarpaa.
- Taamaammat kissaatiginartorujuuvoq Sullissiviit, kommuneqarfiit piareernissaat assut. Massakkorpiaq uagut kisitta sullissisinnaagattapajaaq, Helle Mark oqarpoq.
AAMMA ATUARUK Allakkanik nassitsisarneq atorunnaalersoq: Allagakkat aappaagumik digitalimik nassiunneqartalissasut
Utoqqalinersiutilik, Else Kleist, uinilu maanna MitID-taareerput.
Ajornaatsuinnaasimanngilarli. Taakkua aningaaserivimmit Sullissivimmut saaffiginneqquneqarput. Uiatami kinaassutsimut uppernarsaataa nutartigassaasimavoq.
Ernertik ikiortigiinnaraat
Taakkuli akunnerni arlalinni utaqqereeramik utaqqeqqikkusunnatik Sullissivimmut saaffiginninngillat. Paarlattaanik uiata ernertik ikiorsiullugu aatsaat iluarsivaat.
- Tassa aatsaat ernerput aggertillugu pillugit pillugit taakkua marlunngorlutik iluatsittusakkaapput. Kisianni assorujussuaq pisariunaarpagut, Else Kleist oqarpoq.
MitID digitalimik akiliiniarnermi aamma atorneqartussaavoq. Iluatsinniarneralu ilungersunarmat taakkununnga kingunerluuteqarpoq.
- Akiligassamik ataatsimik taanna patsisaalluni kinguartuuleraluarpugut, Else Kleist oqarpoq.
AAMMA ATUARUK e-Boks atorlugu digitalimik tamanut allagarsiisoqartalissaaq
Pisortat innuttaasut tamarmik ukioq manna oktobarip naannginnerani MitID-taareersimanissaat anguniagaraat.
KNR-p MitID-mut akisussaasuusoq, Digitalimik Sullissinermut Aqutsisoqarfimmi pisortaq, Katrine Hjelholt Nathanielsen ajornartorsiut pillugu apersorusullugu saaffigaa, sulili akissutissarsinani.
