Allakkanik nassitsisarneq atorunnaalersoq: Allagakkat aappaagumik digitalimik nassiunneqartalissasut
- Ulloq 1. januar 2021 aallarnerfigalugu innuttaasut tamarmik 15-ileereersimasut pisortani oqartussaasunit pingaarutilinnik allagarsianik pissarsisassagamik digitalimik allakkerivimmi takusarnissaanut pisussaaffeqalissapput.
Namminersorlutik Oqartussat tusagassiuutinut nalunaarummi allapput.
Digitalimik allagarsiat pillugit
Pisortatigut oqartussaasut assersuutigalugu tassaapput kommuunini Namminersorlutillu Oqartussani ingerlatsiviit suliffeqarfiillu.
Allakkat tassaasinnaapput Akileraartarnermut Aqutsisoqarfimmit ukiumut naatsorsuutit, kommunimiilluunniit ilisimatitsissutitut allakkat.
Suliffeqarfinnit namminersortunit allakkanik digitaliusunik aamma allagarsisinnaavutit. Taamaattorli tamanna periarfissaasinnaassappat suliffeqarfik namminersortuusoq e-Boksimut nassiussisinnaasussatut attavilersimasariaqassaaq illillu allagarsisinnaassaguit e-Boks-eqartariaqassallutit.
Eqqumaffigissavat suliffeqarfinnit namminersortunit allakkanik digitaliusunik aatsaat allagarsisinnaagavit, suliffeqarfik e-Boks-imut attavilersissimappat.
Tigusiffik: Naalakkersuisut
E-boks ullumikkut atorneqarsinnaalereerpoq – ukiortaamiilli tamanna periarfissaajunnatut ikkunnaassaaq. Ukioq nutaaq aallartippat oqartussanit allakkat tassunga nassiunneqartalissapput, taamaammat takusarnissaanut pisussaaffeqalissaatit.
Digitalimik allakkat www.e-boks.dk-kkut takusarneqarsinnaapput. Aamma app-i oqarasuaatinnut angallattannut aasinnaavat. NemID-qanngitsut kommuniminnut, aningaaserivinnut imaluunniit www.nemid.nu-mut iserlutik saaffiginnissapput.
Qarasaasiatigut allagarsisarnermik atuisinnaanngitsut pisussaajunnaarsinneqarnissaq pillugu qinnuteqarsinnaapput. Pisussaajunnaarsinneqartut allagarsiaat pisarneq malillugu nassiunneqartassapput.
Pisarneq malillugu allagarsisaannarniartut innuttaasunut sullissivimmut qaninnermut saaffiginnissapput.
Namminersorlutik Oqartussat innuttaasunut ileqqoq malillugu allakkanik nassitsittarniartunut qinnuteqarnissamut piffissaliussatik inuit ukiui malillugit killilerpaat:
- Ulloq 1. januar 2021-mi 30-t ataallugit ukiulinnut qinnuteqarnissamut killiliussaavoq 31. oktober 2020
- Ulloq 1. januar 2021-mi 50-it ataallugit ukiulinnut qinnuteqarnissamut killiliussaavoq 30. november 2020
- Ulloq 1. januar 2021-mi 70-t ataallugit ukiulinnut qinnuteqarnissamut killiliussaavoq 31. december 2020.