Politikki

Innuttaasoq: Randi Broberg - Nalitsinni Navaranaaq

Inuiaat Kalaallit inussiarnersuupput, ilassiortuullutik ammasuullutillu, Kalaallissaaq nunaminnni alianaatsorsuarmi tikeraartiminnut qungujulasuunertik ikiuukkumassusertillu qangarsuaanilli ilisarnaatigaat. Inuiaqatigiinni sumiluunniit inissisimagaluaraangatta immitsinnut inoqatitsinnullu ataqqinnissuserput asanninnerpullu pigiuaannarparput", ammip qalipaataa aallaavigalugu immikkoortitsineq akiorniarlugu facebookimi katersuuttarfik nutaaq taama aallaqqaasiutaani allassimavoq.

Allattoq Simon Uldum -

apriilip 24-at 2013 07:51

Facebookimi katersuuttarfimmik pilersitsitsoq tassaavoq Gabanguak Bidstrup, taannalu ilaatigut ima allappoq:

- Nipipalaat taakku ajugaassappata, inuiaat imminnut akaareqatigiillutik, eqqissillutik pinngortitarsuarmi assiitsumik alianaassusilimmi inuunerannik oqaluttuaq kusanartoq, qagugorsuarmut utertitassaajunnaarluni sequminneqassaaq.
Tamanna tassanngisaannarli Kalaallit Nunaat ingunngorfiga periartorfigalu. Tamanna tassaanngisaannarli Kalaallit Nunaat meeqqannut asasannut, ernutanguannullu asangaakkannut ingerlateqqitara.

Isummersoqatigiiffimmik taama ittumik pilersitsinissaq sooq pisariaqarsoriviuk?

-Pisariaqarsorivara akuersaarsinnaannginnakku, akueriumanagulu Kalaallit Nunaanni Namminersorluni ingerlalersumi parteeqalermat ammik qalipaataanik immikkoortitsinermut akuersaartutut nipeqartunik peqalermat, facebookimi katersuuttarfimmik pilersitsisuusoq Gabanguak Bidstrup knr.gl-imut oqarpoq.

Aamma ilaatigut allapputit Randi Broberg tassaasoq nalitsinni Navaranaaq, taanna itisilersinnaaviuk?

- Oqaluttuarisaanitsinni inuiannik assigiinngitsuni maani nunatsinni najugaqartunik sequtserisutut sorsutsitsilersutullu Navaranaap atuussimanera ilisimavarput, nalunngilarpullu eqqissilluni inooqatigiissimanermik aseruinermik pilersitsisuusutut oqaluttuarineqartoq; taamaammat naak ilaannut sakkortuginarsinnaagunaraluartoq, allamik asserrsuutigssaqanngilanga, ammimmi qalipaataanik immikkoortitsineq nunami allamik assersuutissaqartinngilara taammaammat Navaranaamut assersuuppara.

Aamma allapputit inuiaasugut kalaallit allamiunut inussiarnersuulluta, ilassiortuulluta ammasuusugullu - aammami tamanna tusamaaneqaatigalugulu ilisarnaatigigatsigu. Isumaqarpit Partii Inuiti maanna taamatut oqariartuuteqaqattaarnera nunatta isigineqarneranut ilaatigullu immaqa takornariaqarnikkut, atorfinnut pisariaqartitatsinnut sulisussarsiornikkut ajornartorsiortitsilersinnaassasoq?

- Soorunami nunani killerni ilaaniaasaarluta, naalakkersuisuni partiimik oqaluttoqalerpat ammip qalipaataanik nipilimmik, taava tamanna inuiattut isigineqaatitsinnut minnerunngitsumillu oqaluttuarisaanitsinnut akornusiisussaavoq. Matumanimi eqqaamassavarput partii illuatungiliuttoq pineqarani Naalakkersuisuutitaqartoq pineqarmat.
Ila kina nunamut asissugaaffigiumaagassatut nalunngisaminut suliartorusussava?
Kiap nuna assigiinngisitsinermik aallaaveqartoq ornigissavaa?, Gabanguak naggasiilluni aperivoq.

Facebookimi katersuuttarfik ippassaq pilersinneqartoq maannamut 369-init ilaasortaaffigineqalersimavoq, ugguunalu alakkarneqarsinnaalluni: https://www.facebook.com/groups/243292319143082/

Innuttaasoq: Randi Broberg - Nalitsinni Navaranaaq

Aamma atuaruk