Paasissutissat mianernartut siammarterneqarsimasinnaasut: Stinus Silassen ernumasoq
Kommune Kujalleq qarasaasiatigut oktoberimi saassunneqarmat paasissutissat inunnut ataasiakkaanut tunngasut ingerlateqqinneqarsimasinnaasut, kommune nittartakkamini allappoq.
Kommune Kujalliup qarasaasiaata serverii saassunneqarmata kommuni isumaginninnermi ikiorsiissutinik, soraarnerussutisianik akilersuutinillu tunniussisinnaasimanngilaq.
AAMMA ATUARUK Kommune Kujallermi qarasaasiatigut saassussineq: Inunnut paasissutissat ingerlateqqinneqarsimasinnaasut
Tamatuma imminik qanoq kinguneqarsinnaanera, Kommune Kujallermi innuttaasup ilaata ernummatigaa.
- Kommune tatigaara, soorunami aarlerinarsinnaavoq uannut tunngasut paasissutissat allat tigusimappatigit annilaanganarsinnaavoq, Stinus Silassen KNR-imut oqarpoq.
Attaveqaatilli aaqqittut kommunilu qarasaasiatigut nalinginnaasumik ingerlatseqqilertoq, Kommune Kujalleq nittartakkamini sapaatit akunnerata siuliani allappoq.
Aningaaserivimmi kontot inuillu normui
Qarasaasiatigut saassussineq peqqutaalluni kommunip inuit ataasiakkaat pillugit qarasaasiatigut paasissutissaatai ajoraluartumik ingerlateqqinneqarsimasinnaapput.
Stinus Silassenip tamanna aarleqqutigaa.
- Royal Greenland qarasaasiatigut 2021-mi decembarimi saassunneqarami attaveqaataanut ullorpaalunni akornusiivoq. Tamanna ilaatigut sulisut tamakkiisuunngitsumik aningaasarsinerannik kinguneqarpoq
- Namminersorlutik Oqartussat qarasaasiatigut marsimi saassunneqarami nunatsinni kommunit arlallit attaveqaataannut akornusiillunilu Inatsisartut upernaakkut ataatsimiinnerisa unikkallarneranik kinguneqarpoq
- Peqqinnissaqarfiup attaveqaatai maajip aallartisimalaarnerani akornuserneqarujussuarput. Tamanna qarasaasiatigut saassunneqarsimaneranik peqquteqartoq, saassunneqarneraniit ullualuit kingorna paasineqarpoq.
- Kommune Kujalleq qarasaasiatigut oktobarimi saassunneqarami ilaatigut innuttaasut pisartagaannik tunniussisinnaajunnaarpoq.
- Cpr-normora assersuutigalugulu aningaaserivimmi kontora pillugit paasissutissat tiguneqarsimasinnaapput, kontoralu taamaalilluni ilanngarterneqarataannalluni, Stinus Silassen oqarpoq.
Taamaaliortoqarataannaasorlu, Nammi- nersorlutik Oqartussat Digitalimik Sullissinermut Aqutsisoqarfiata pisortaa Katrine Hjelholt Nathanielsen aamma isumaqarpoq. Paasissutissat ingerlateqqinneqarsimasinnaasut sumut tunngasuunersut, taassuma oqaatigisinnaanngilaa.
AAMMA ATUARUK Nunarput qarasaasiatigut pinerliinianut isumannaallisarnerulertoq
Paasissutissalli mianernartut taavalu nalinginnaasut soorlu inuit aqqinut najugaannullu tunngasut kikkunnilluunniit takuneqarsinnaasut immikkut nalunaarsorneqartartut, taanna oqarpoq.
- Aningaasaqarnermut aamma tunngasuusinnaapput. Paasissutissallu taakku nalinginnaasuupput, assersuutigaluguli isumaginninnermi peqqinnissaqarfimmiluunniit suliani ilanngullugit nalunaarsorneqakkajupput, taamaalillutillu paasissutissat taakkua mianernartuulersarlutik.
- Inuup normuanut aamma tunngasuusinnaapput. Inuup normua kinaassutsimik uppernarsaataavoq allanut ingerlateqqinneqaqqusaanngitsoq. Taanna kikkunnilluunniit takuneqarsinnaalersimappat aarlerinarpoq, Katrine Hjelholt Nathanielsen oqarpoq.
Kimigiiserluni aningaasanniarneq aningaasanillu peqquserluuteqarneq
Kommune Kujalliup qarasaasiatigut saassunneqarnera inuinut qanoq kinguneqassanersoq oqaatigiuminaattoq, Katrine Hjelholt Nathanielsen oqarpoq. Paasissutissammi ingerlateqqinneqarsimasinnaasut sumut tunngasuunersut apeqqutaavoq.
Kommune Kujalliup inuisa makku tamatigut eqqumaffigissagaat kommunip kaammattuutigaa:
- Mailinik, allakkanik, akiligassanik ilimaginngisanik ilisarisimanngisanit nassiussarsisoqarsimanersoq.
- Qarasaasiatigut isumannaallisaanissaq eqqumaffigilluarneqassasoq. Assersuutigalugu aningaaserivippit qarasaasiakkut isumannaallisaaneq pillugu kaammattuutai misissukkit.
- Qarasaasiakkut niuerniaraanni MIT ID atorneqassasoq.
- Isissutissat (password) akuttunngitsumik allanngortinneqartassasut.
- Paasissutissat ingerlateqqinneqarsimasinnaasut mianernartuusimappata, tamanna inuisa eqqorneqaatigisinnaavaat. Aningaasanillu peqquserluutigineqarsin- naappata, inuisa aningaasanik annaasaqaatigisinnaavaat, taanna oqarpoq.
Sooruna inuit ataasiakkaat pillugit paasissutissanik pinerliiniarluni ingerlatitseqqiisoqartartoq?
- Qarasaasiatigut pinerliiniartartut ilaat oqartussanut saassutaminnut paasissutissat taakkua atorlugit kimigiiserlutik aningaasannanniartarput.
Aamma paasissutissat anngiortumik alapernaarsukkatik inunnut aamma kimigiiserlutik aningaasannanniutigisinnaasarpaat.
- Taamaaliortoqarpat tamanna politiinut soorunami nalunaarutigineqassaaq, Katrine Hjelholt Nathanielsen oqarpoq.
Paasissutissalli siammarterneqarsimasinnaasut sumut tunngasuunersut ilisimaneqanngimmat, inuit qanoq iliussanersut Katrine Hjelholt Nathanielsenip oqaatigiuminaatsippaa.
Inuit ilimaginngisamik mailisiatik akiligassarsiatillu ammartassanngikkaat kodiminnillu allannguikkajussasut, Kommune Kujalleq tusagassiuutinut sapaatit akunnerata siuliani nalunaarpoq.