Innersuaq 2014 tunniunneqarpoq
Ajugaasut ippassaq Nuummi Ilimmarfimmi nersornaaserneqarput.
Kalaallit Nunaanni filmiliortartut peqatigiiffianni Film.gl-imi siulittaasup, Pipaluk Kreutzmann Jørgensenip nersornaammik tunniussivoq. Filmilu pillugu aamma oqaaseqarluni, filmi pissanganartoq piviusorsiortorlu nipilersoqatigiit Sumekkut ataqatigiilersitsinerannut Kalaallit Nunaataluqaluttuarisaanerani kulturikkut mumisitsinerannut tunngasuunerarpaa.
- Filmilioriaaseq atorlugu 70-ikkunni Kalaalit Nunaanni pissutsit takutippaat ullutsinnullu aamma tunngalersillugu, Pipaluk Kreutzmann Jørgensen oqalugiarnermini oqarpoq.
Filmi inunnit 10.000-init amerlanernit nunatsinni takutitsinerni takuneqareerpoq, nunanilu allani nunatsinnut soqutiginnilersitsilluni kulturitsinnilu takutitsilluni.
- Oqaluttuagut uagutsinnuinnaq oqaluttuarissanngilagut, nunarsuarmulli tamanut oqaluttuarissallugit. Filmip assitaatigut oqaluttuaatigullu ima suliaavoq nunarsuup sinnerani suliarineqartartunut assersuunneqarsinnaalluni. Nipilersortartut kisimik oqaluttuarineqanngillat, Kalaallit Nunaatali oqaluttuarisaanerani pisut pingaaruteqartut sunniuteqarluarsimasullu takutinneqarlutik, filmiliortartut peqatigiiffianni Film.gl-imi siulittaasup nersornaasiinermini taama oqarpoq.
Filmiliortartut peqatigiiffiata nersornaasiuttagaa "Innersuaq" ukioq kingulleq siullermeerluni tunniunneqarpoq.
Nunatsinni filmiliorneq
Film.gl 2012 aallartinneqarpoq, nunatsinni filmiliortartunut atugassarititaasut pitsanngorsarniarlugit. Filmiliornermik suliallit amerlapput ilaallu inuussutissarsiutigalugu ingerlatsillutik, peqatigiiffiulli nunatsinni filmiliornerup qaffassarnissaa pisariaqarsoraat.
- Maannakkut Naalakkersuisunngortuni Naalakkersuisooqatigiilernissamut isumaqatigiissutaanni atuarneqarsinnaavoq Nunatsinni filmiliornermut institutiliortoqassasoq. Neriuutigivarput aalajangiisartut piviusunngortitsiniarlerpata ilusilersueqataanermut peqataatinneqassalluta. Tamannami pillugu sulivugut, Pipaluk Kreutzmann Jørgensen oqarpoq.
Nunatsinni filmiliornermi ukioq 2014 immikkuullarippoq. Filmi "Inuk" suli nunani allani nersornaasisisarpoq, nunatsinnillu nunani allanni suli nittarsaassilluni. Piviusulersaarusiaq "SUME - Mumisitsinerup nipaa" saqqummerpoq, nunatsinni nunanilu allani oqaluuserineqarluarluarluni takuneqarluarlunilu. Tumit Production ersinartulersaarummik nutaamik filmimik takutitseqqippoq, "Unnuap Taarnerpaaffiani" aningaasartuuteqarpianngitsumik filmiliorsinnaanermik takutitsilluni. Ukioq mannattaaq nunani avannarlerni nunatsinnilu filmiliortarneq pillugu Greenland Eyes International Film Festival ingerlanneqarpoq, tassani nunatsinni filmiliat assigiinngitsut Danmarkimi, Sverigemi, Norgemi, Finlandimi, Islandimi, Savalimmiuni Nunatsinnilu takutinneqarlutik.
