Innarluutillit olympiadeqarnerat aallartippoq

Innarluutillit Canadami olympiadernissaat Vancouverimi ullumikkut aallartippoq. Olympiadimi ikumatitaq Vancouverip qeqqani nalliuttorsiualaarnermi ikinneqarpoq. Tamanna sioqqullugu ikumatitaq tigummiartagaq akunnerit kingulliit 24-it ingerlaneranni 300-joriarluni inunnit sinnerseraalluni tigummineqareersimassaaq, tassami unammiuaarnissat ammaanersiunnginneranni ikumatitaq Vancouverimi aqqusinertigut ingerlanneqaqattaaqqaartussaavoq.

Ammaanersiorneq sumiiffimmi nalunaaqutaq tallimanut aallartissaaq. Ikumatitaq Victoria Islandimi nunap inoqqaavinit naggueqatigiinnit Pikwakanaganinit aamma Kitigan Zibi Algonquininit marsip pingajuanni ikinneqarpoq. Ikumatitaq inunnit 600-junit amerlanerusunit tigummiarneqarsimavoq – ilaatigut Canadami naggueqatitsinnit ilaaffigineqarsimalluni.

Innarluutillit ukiuunerani olympiadeqarnissaanni timersortartut 1000-init amerlanerusut nunaniillu 40-nit amerlanerusuneersut peqataassapput. Timersuutit tallimat tassaasut, sangusaarneq aamma sisoraatinik arpanneq, qamuteeqqanik hockey-neq, kaassuartakkanik curlingerneq sisoraaserlunilu ooqattaasarneq ingerlanneqassapput. Sisoraatinik arpaliunnerit aamma sisoraaserluni ooqattaasarnerit qallunaanit peqataaffigineqassapput. Kalaallinik peqataasoqassanngilaq.