Innarluutillit højskolertillugit misililerpaat

Sisimiuni Knud Rasmussenip Højskole-a innarluutilinnik marlunnik maajip aallaqqaataaniit misiliillutik ilinniartoqalerniarput. Højskole-p pisortaa Johanne Olsen ullaaq Iterluarnaamut ima oqarpoq:

- Isumaqarama tamanna sapernatigu, taava soormi innarluutillit Nunatsinni Højskolersinnaassanngillat, Johanne Olsen oqarpoq.

Misiliinermili timimikkut innarluutillit salliunneqassanngikkallarput:

- Qaratsamikkut aanaartooreernermik innarluuteqalersimasut aammalu sungiusaqqittariaqartut inuiaqatigiinnut uterteqqinnissaat siunertaralugu Højskolertitsisalernissaq siunertaavoq, Johanne Olsen oqarpoq.

Nunatsinni innarluutillit amerlaqaat allatulli peqqissutut piginnaasaqartut. Maajip aallaqqaataaniit misiliineq iluatsissappat pilersaarutaavoq augustimi ilinniarneq aallarteqqippat innarluutilinnik sisamanik ilinniartoqartalerumaartoq. Tamaattumik Højskole-p pisortaata neriuutigaa Naalakkersuisut suliniummut tassunga peqataarusullutik aningaasalersueqataalerumaartut:

- Innarluutillit taakku marluk aallartittussat kommeneminnit aningaasaliiffigineqarlutik aallartissapput. Neriuutigaarput Naalakkersuisunit isumassarsiarput tigulluarneqarluni aamma taakku aningaasaleeqataasalerumaartut, Knud Rasmussenip Højskoleata pisortaa Johanne Olsen oqarpoq.

Ilinniartitaanermut Naalakkersuisoq Palle Christiansen Radioaviisimut oqarpoq, Højskole nammineerluni imminut aningaasalersortuummat imaaliaallaannaq aningaasaleeqataasinnaanatik. Innarluutilinnik Højskole ilinniartoqalissaguni ilinniartut innarluuteqanngitsut assigalugit kommunenit taakku aningaasalersugaasussaammata.

- Innarluutillit innarluuteqanngitsutulli ilinniartuunissaminnut periarfissaqarput, taamaattumik taakku immikkut aningaasanik ikiorsiiffigineq ajorpavut. Ilinniartitaanermut Naalakkersuisoq Palle Christiansen oqarpoq.

Højskolip pisortaata Johanne Olsenip ilanngullugu Iterluarnaamut oqaatigaa, atuarfik innarluutilinnut immikkut suliaanngimmat timimikkut innarluutilinnik atuartuuteqarsinnaanngikkallarlutik.