Innarluutilinnut sullissisut ilinniagaqarnissamik pisariaqartitsipput
Tarnimikkut napparsimasunut sullissisut ulluni makkunani Ilulissani Hotel Arctic-imi ilaqutariinnermut pisortaqarfimmiit aaqqissuunneqartumit pikkorissartinneqarput. Ullormi siullermi sullissisut pikkorissarneqakulaannginnertik kiisalu tarnip pissusaanik ilisimasakinneq sulisut nikerarnerujussuannik pissuteqartoq oqariartuutigaat.
-Aallartinnitsinni massakkumut eqqartukkatsinni malunnartorujussuuvoq sinerissami sulisut aalaakkaannginneri tassa sulisut taarserarnerujussuat Nunatsinni ajornartorsiutaavoq, aamma malunnartorujussuuvoq sulisut sineriak tamakkerlugu ilinniarsimanngittorpassuusut. Taamaattumik pisariaqartuaanartuuvoq pikkorissartuarnissaq aamma tunniussassagut annikippallaassagamik immitsinnut aamma qasutittarluta, pikkorissaasoq Ivalo Møller Lange siornatigullu Aaqami pisortaasimasoq oqarpoq.
Sulisut nikerarnerujussuat tarnimikkut napparsimasut toqqissisimajunnaarutigisarpaat.
-Soorunami najugaqartut malugisartorujussuuaat soorlu inuit nutaat amerlavallaalerpata sulisullu taarseraapallaalerpata, taava najugaqartunut aamma toqqissinarneq ajorpoq, taava eqqissiviitsunngortarput, kisianni taarseraapallaarunnaarnissaat anguniarparput tamannalu ulloq manna tikillugu anguniartuarparput, Aaqami pisortap tullia, Marie Heilmann Nielsen oqarpoq.
Namminersorlutik oqartussani Innarluutillit allaffissornikkut immikkoortortaqarfiani pisortaq, Henrik Sand oqarpoq innarluutilinnut sullissisunik pikkorissaasarnerit ingerlaavartumik aaqqissuunneqartartut, apeqqutaallunilu sorpiaat amigaatigineqarnersut, erseqqissaatigaali sulisut aalaakkaanginnerujussui pikkorissaaniarnermuttaaq sunniuteqaqataasartoq.
