Innarluutilinnut sapaatit-akunnerat 41 Nanortalimmi malunnartinniarneqalersoq

Innarluutilinnut sapaatip-akunnera 41-p malunnartinneqarnissaata ukioq manna qulequtaa tassaavoq:
"Kingusissumik ineriartornikkut innarluutillit inuiaqatigiinnut akuutitaanerulernissaminnut periarfissaat".

Innarluutillit sulliviat "Qupannaaraq", inuttut ineriartornermikkut kingusissunut najugaqarfimmi isumannaallisagaasumi "Ulluaqqat"-ni, najugaqarfimmilu "Ullut"-ni najugaqartut, atuisartut sulisullu ulluni makkunani ulapputtut Kommune Kujalliup nalunaarutigaa, nunarput tamakkerlugu innarluutilinnut sapaatip-akunnera 4-mi  pisussat pillugit ulappullutik.

- Assut Iluarisimaarparput najugaqartuutivut aammalu atuisartuutitvut periarfissaqarmata sapaatip-akunnerata ilivitsup ingerlanerani pikialaarlutillu ersarinnerusumik innuttaaqataaffimminni peqataasinnaallutik, najugaqarfimmi isumannaallisagaasumi "Ullut"-ni aqutsisoq Joan Gyllich oqarpoq.

Sapaatip-akunnerata aallartinnera malunnartinniarlugu Nanortalimmi ataasinngorpat ingerlaaqatigiittoqassaaq, "Qupannaaqqap" eqqaaniit kommunip allaffiata silataanut ullaap tungaani qulinut qiteqquppat ingerlaaqatigiittoqassalluni.

"Qupannaaraq" tamanut marlunngorpat ullaakkut nalunaaqutaq arfineq-pingasuniit ualikkut pingasut tungaannut taava ammatinneqassaaq, kaffi, tii kaagillu sassaalliutigineqassallutik, sullivimmillu atuisut suliaannik aamma tuniniaasoqassalluni.

Katersortarfimmilu pingasunngorpat unnukkut nalunaaqutaq arfineq-marlunut ammarneqartussamik unnussiuaartoqassaaq, erinarsortoqarluni, oqalugiartoqarlunilu, sapaatillu-akunneranut tunngatillugu aaqqissuussanik allanik aamma sammisassaqartoqassalluni.