Innarluutilinnut ineqarfissaq ukiuni 30-ni utaqqisaareerluni atoqqaartinneqartoq

Nammineq inigisaq, timigissartarfik, assassortarfik inersuarlu katersuuffiusinnaasoq.

Aasianni innarluutilinnut 18-inut ineqarfissaq maajip sisamaani ammarnersiorneqarmat, tamakkua tamarmik innarluutilinnut arlalinnut piviusunngorput.

- Isumalerujussuuvoq aamma innarluutilinnut maani kommunitsinni pineqartunut, ukiorpassuit taakku utaqqinikuugamik, Kommune Qeqertaliup borgmesteria Ane Hansen KNR-imut oqarpoq.  

Innarluutillit nalinginnaasumik inuuneqarnissamut tunngavissagisssaarnissaat, Kommune Qeqertallip kommunalbestyrelsianut pingaarnerpaavoq.

- Qutsannaqaat innarluutillit inissiamik taama kusanartigisumik avatangiiseqaleramik, sammisassaqartinneqarsinnaallutik illup iluani, timersorsinnaallutik taavalu aamma katersuuffissaqarlutik, Ane Hansen oqarpoq.

Ukiorpassuarni utaqqisaasoq

Sanaartugassaq taamani Aasiaat Kommuniata kommunalbestyrelsiata ukiut 30-it maatuma siorna akuersissutigigaluarpaa.

Borgmesterillu kommunalbestyrelsimut ilaasortanngoqqammerluni siunnersuutigisimasamini siullernut ilaasoq eqqaamavaa.  

Aatsaallu piviusunngorneranut aningaasat allanut atorneqartariaqartarsimanerat, borgmesterip pissutaatippaa.

- Tulleriiaarinerit taamaattarput amerlasuutigut. Siunnersuutit isumaqatigineqaraluarlutik, kisianni sanaartornerup aningaasalersornissaannut killikkaangatta allat pingaarnerusarput, Ane Hansen oqarpoq.

Kangaatsiami maanna atuarfiup iluarsaannissaa pisariaqarluinnarmat, taanna ilaatigut salliutinneqarsimavoq.

Taava aamma kommunip nunaqarfiini meeraaqqeriviit meeqqeriviillu kommunillu utoqqartanut amerliartortunut angerlarsimaffik amigatigineqarsimapput.

Kommunalbestyrelsip suliassaq 2018-mi aalajangiuppaa suliassaq salliutinneqassasoq, taamaalillunilu innaarluutillit ineqarfissaat ukiorpassuarni utaqqisaasoq 2020-mi aningaaasaliiffigineqarpoq.