Mælkebøtteni: Meeraaqqanut immikkoortortaq pisariaqarteqaarput
![](/sites/default/files/styles/image_934x467/public/article_images/maelkeboetten_nuuk_10_aars_jubilaeum_9.jpg?itok=U1sWVWvC)
Nuummi meeqqat inuusuttullu ornittagaat imminut ingerlatittoq, Mælkebøtten, meeraaqqani sumiginnarneqarsimasunut ukioqanngitsuniit pingasunik ukiulinnut immikkoortortaqalissaaq.
Immikkoortortariligassaalu Ailimik ateqassaaq.
Meeraaqqat toqqissisimasumik alliartornissamik Ailimi periarfissaqassapput, angajoqqaavilu qitornamik pisariaqartitaannik qanoq tunniussaqarsinnaatiginersut paasiniarlugu angajoqqaajusinnaasusaannik tassani naliliisoqartassaaq. Tamannalumi angajoqqaanngortussanut aamma atuutissalluni.
Meeqqanik sumiginnaanermik piaartumik iliuuseqarnikkut pinaveersaartitsinissaq tamatumani siunertarineqarpoq.
- Kalaallit Nunaanni angerlarsimaffiup avataanut inissiinerit kingusingaatsiakkajupput, tamannalu meeraaqqanut inissiiffissaalatsisarnitsinnik ilaqutarsiaasinnaalatsisarnitsinnillu peqquteqarluinnarpoq, Mælkebøttenimi pisortaq Kirsten Ørgaard oqarpoq.
Immikkoortortaassaq taanna angajoqqaanngortussat atassuteqarfigiliaarnerisigut angajoqqaajusinnaassusaannik naliliinikkut qitornartaarunik aallartilluarnissaannut tapersersorneqarnissaannik qulakkeerisooqataassaaq.
- Angajoqqaajusinnaassuseqarluartullu allartilluarnissaannik tapersersorniarlugit qitornaasa timimikkut eqqarsartaatsimikkulluunniit qanoq innerannik naliliisassaagut, Kirsten Ørgaard oqarpoq.
Aili nunatsinni meeraaqqanut ukioqanngitsuniit pingasunik ukiulinnut taakkualu angajoqqaavinut ulloq unnuarlu angerlarsimaffiit siullersarissavaat, tamaanilu piaartumik iliuuseqartoqartassaaq.
Pisariaqartinneqaqisoq
Mælkebøttenip Ailimik atserlugu immikkoortortaqalernissi sivisuumik pilersaarusiorpaa. Atuuffissaanut naleqquttumik akuerisamillu inissarsinissaa imaannaasimanngikkaluartoq iluatsippaa.
- Oqartussaasut akuersissuteqariarpata aallartilertornissatsinnut piareersimavugut. Tamannalu 2023-p aallartinnerani pissasoq neriuutigaarput, pisortaq oqarpoq.
Aili meeraaqqanut arfineq-pingasunut inissaqartitsissaaq. Aamma angajoqqaanit najugaqatigisaminnik meeraaraateqarnerminni siunnersorneqarnissamik pisariaqartitsisunit ornittagarineqarsinnaajumaarpoq.
AAMMA ATUARUK Mælkebøttenip ingerlalluarnera nuannaarutigineqarpoq nikallungassutigineqarlunilu
Ailitullumili ittumik pilersitsisoqarnissaa pisariaqartinneqaqaaq. Kommunit taakkunanilu isumaginninnermi siunnertortit ingerlatsiviillu atassuteqarfigilluaritsik taakkulu meeraaqqat Ailitulli ittumiinnissamik pisariaqartitsisut qassiunerannik aamma ilisimatitsisisartut, Kirsten Ørgaard oqarpoq.
- Avannaata Kommuniani meeraaqqani ukioqanngitsuniit pingasunik ukiullinni angerlarsimaffiup avataanut inissinneqartariaqartut tallimat qulillu akornanniittut ilisimatinneqaqqammerpugut, meeraaqqanullu inissaativut arfineq-pingasuinnaapput. Taamaammat immikkoortortariligassarput pisariaqartinneqaqaaq, taanna oqarpoq.
Aili kommuninik, isumaginninnermut auqtsisoqarfinnik, ernisussiortunik, peqqinnissaqarfimmi sulisunik, peqqissaasunik piaartumillu iliuuseqarnermik sulialinnik allanik suleqateqarfiulluassaaq. Taakkuninngalu sapinngisamik suleqateqarluarnerup iluaqutaaneranik kinguneqarluartarneranillu misilittagaqarluaramik taamaaliussallutik, Kirsten Ørgaard oqarpoq.
Japanimiut suliffeqarfiutaat aningaasanik tunissuteqartoq
Japanimiut qarasaasialeriffiutaat Fujitsu Ailimut 125.000 koruuninik tunissuteqarpoq.
Fujitsu Nuummi 2019-imi allaffeqarfittaarpoq. Kalaallit Nunaanni digitaliserinermik suliaqarnermi saniatigut tamaaneeqataanertik ilutigalugu kalaallit ingerlalluarnissaannut aamma taperseerusullutik, Fujitsu tusagassiutinut nalunaarpoq.
- Aili kalaallit meerartaat toqqissisimasumik alliartortut amerlanerulernissaannut aamma soorlu tatituunngornissaannut iluaqutaassasoq qularinngilarput. Meeqqallu soorlu atugarissaarnissaannut perorunillu Kalaallit Nunaanni ineriartortitsinermi aamma iluaqutaalluarnissaannut sunniuteqaqataassangatipparput. Fujitsumiillu tamatumunnga taperseerusuppugut, Fujitsumi CSR-ilerinermi akisussaasoq Susanne Münter tusagassiutinut nalunaarpoq.
Fujitsup aningaasanik tunissuteqarnera Mælkebøttenip nuannaarutigaa, aningaasallu taakku meeraaqqanut qamutinik, siniffeeqqanik madrasseeqqaanillu pisiortuutiginiarpai.
Aamma aningaasaateqarfiit tapersiisartullu allat Mælkebøttenimut aningaasanik tunissuteqartarput, Mælkebøttenimili ingerlatsineq kommunimit meeqqanut ulloq unnuarlu angerlarsimaffimmut inissitanut akiliuteqartartumit aningaasalersorneqarpoq.
Mælkebøtteni
Mælkebøtteni ukiut 16-it matuma siorna ammarpoq, siornalu coronavirusip tuniluutileruttornerani ukiunik 15-inngortorsiornera aatsaat malunnartinneqaqqammerpoq.
Kunngissatta nulia Mary tamatumunnga atatillugu sapaatit akunneranni uani nunatsinniippoq.
AAMMA ATUARUK Lanap Mary naasunik tunivaa: Assikkuinnaq takusarnikuuara
Mælkebøtten meeqqanit inuusuttunillu ornittagaavoq, meeqqallu inuusuttullu pingasut aqqaneq-marlullu akornanni ukiullit atugaat qanoq innerallu tassani naliliiffigineqarsinnaasarput. Meeqqat naleqquttumut inissinneqarnissaat siunertaralugu taamaaliortoqartarpoq.
- Meeqqat sumiiffinnut assigiinngitsorpassuarnut inissinneqartarnissaat ingalassimaniarlugu inissinneqarneranniit sapinngisamik sullilluarneqarnissaat anguniarlugu angajoqqaavi, sullissisui, atuarfigisaanni meeqqeriviannilu sulisut suleqatigalugit qulaajaanertalimmik naliliiffiginiartarpagut, Kirsten Ørgaard oqarpoq.
Nunatsinnili meeraaqqat naliliiffigineqareersut ilaannut inissiiffissaalatsisoqartartoq, Mælkebøttenimi sulisunit paasineqarnikuuvoq. Tassa meeraaqqat taakku nunatsinni inissiffissarsineqarsinnaasimanngillat. Taamaammat taakkununnga immikkoortortaqarfeqalerniarlutik Mælkebøttenimiut aalajangerput.
Maanna marlunnik immikkoortortaqarpoq, aappaa Ilasiamik aappaalu Allumik ateqarput. Taakku katillutik 26-nik meerartaqarput.