Lanap Mary naasunik tunivaa: Assikkuinnaq takusarnikuuara
Mary takugakku tupappunga, tusaamasamimmi takugama.
Lea Bella Mølgaard taama oqarpoq, Nuummi kunngissap nulia Mary Mælkebøttenimut pulaarmat Lea Bella Mølgaard tikilluaqquseqataavoq. Mælkebøtten meeqqat inuusuttullu ornittagarivaat, sammisassaqartitsiviutigalunilu qimarnguiusoq.
Lea Bella Mølgaard: assiliisoq: Megan Hansen
Sooruna tupappit?
Prinsesseummat
Qanoq piareersaateqarpit?
Qanoq kutaassanerlugu ilikkarpara.
Arlaannik sanaannikuuiuk?
Ija, titartaannikuuara, Sermitsiaq titartarpara, neriuppunga paariinnassagaa, taanna oqarpoq.
Mælkebøttenimut pulaarneranut patsisaavoq, meeqqat angerlarsimaffiat ukiuni 15-ini nalliuttorsiutigineqarmat, naak 16-liigaluartoq corona patsisaalluni nalliuttorsiorneq siorna kinguartittariaqarsimavoq.
Angunnguaq Lybert. asiliisoq: Megan Hansen
Angunnguaq Lyberth aqqanilinnik ukioqarpoq, ullumikkumullu piareersaateqarsimalluni.
-Atisassakka suut atussanerlugit piareersarpakka, Anguteeraq oqarpoq.
Qanimut takullugu qanoq ippa?
-Ajorpallaanngilaq, aamma kutaarlugu eqqumiilaarpoq.
Lars-Pavia Aqe spillersuataartoq Mary iserpoq takutippaalu Fortnite qanoq spillertarneraat, ullumikkullu pingaartorsiorfiummat atisani kusanartut atisimavai. assiliisoq: Megan Hansen
Mary: Ullumi pingaarutilimmik suliaqarpugut
Lana Frederiksenimut ulloq immikkuullarisuuvoq. Kunngissammi nulia Mary tikilluaqqullugu taanna naasunik tunisisuuvoq.
- Nuannerpoq, pissangavunga, KNR-mut oqarpoq.
Lana Frederiksen ullormi immikkuullarissumi kalaallisoorpoq.
Aatsaat siullermeerlutit Mary takuiuk?
- Ija, aamma nuanneqaaq, aamma inuueqatigigakku.
Mary mælkebøttenimut pulaannginnermini, anorersuup sialussuullu ataani eqqakkanik Nuutoqqami katerseqqaarpoq.
Eqqakkanik katersinermi meeqqat qulit atuareernermi paaqqinnittarfik Aqqalumeersut Maryp katerseqatigivai.
AAMMA ATUARUK Assit: Kunngissap nulia sialussuup ataani eqqakkanik katersisoq
Eqqakkallu katersorneqartut Hans Egedep illuani immikkoortiterneqarput, katersineq WWF-miit aaqqissuunneqarpoq.
Kunngissalli nuliata silarlunnera aporfiginngilaa.
- Sila pitsaanerpaanngikkaluarpoq eqqakkanik katersiffigissallugu. Kisianni soqutaanngilaq, tamannami pingaaruteqarpoq, kunngissap nulia KNR-mut oqarpoq.
- Meeqqat qanoq suliamut pingaartitsitsiginerat takullugu nuannaarutigaara. Aamma qanoq soqutiginnitsiginerat. Ullumi suliatsinni pingaaruteqartunut ilaavoq.
-Pingaaruteqartorujussuuvoq meeqqat paasissagaat eqqakkat nunamiiginnannginnissaat. Meeqqat angajoqqaaminnut oqariartuummik ingerlatitseqqissapput, tassa pinngortitap paarilluarneqarnissaa pillugu.
Kunngissap nulia sialuup ataani eqqakkanik katersereerluni immikkoortiteriartulersoq Assiliisoq: Megan Hansen
Kamik aamma eqqagassanik katersisunit iginngitsoorneqanngilaq Assiliisoq: Megan Hansen
Aqagu pilersaarut malillugu nalunaaqutaq 9.30 Kunngissap nuliata tikeraarnera nangeqqissaaq, tassanilu Hotel Hans Egedemi ataatsimiinnermut “aliasunneq ataatsimoorutsigu”-mik taaneqartumut peqataassaaq. Taanna Det Nationale Sorgcenterip aaqqissuussaraa.
Ataatsimiinneq nalunaaqutaq 11.30 naammassissaaq, Ilisimatusarfimmilu ullup qeqqasiorluni nereqataareeruni, nalunaaqutaq 13 15 Unleashimik taaguuteqartumut inuusuttut 200-t nunanit avannarlerneersut issittumeersullu Naalagaaffiit Peqatigiit nunarsuami anguniagaannut atatillugu ineriartortitsillutillu isumassarsiorfigisaannut peqataassalluni.
Inuusuttut aaqqissuussinermi tassani nunarsuarmi peqqissutsip qanoq pitsanngorsarneqarsinnaanera, ilinnialernissamut pitsaanerusumik periarfissaqalernissaa, silallu pissusiata ilungersunartumik inissisimanera eqqartorpaat.
Maryp ullormut pilersaarutai nalunaaqutaq 15.30 Unicefimut pulaarnermik naggaserneqassaaq. Marylu tamatuma kingorna angerlamut aallaqqissalluni.
