Siunnersuut: Innarluutilinnut inatsit ukiumik ataatsimik kinguartinneqartoq
Inatsit siorna ukiakkut ataatsimiinnermi siullermeerneqarpoq upernaarlu manna aappassaaneerneqarlunilu pingajussaaneerneqartussaagaluarluni. Qinersisoqarmalli upernaakkut ataatsimiinneq taamaatiinnarneqarpoq.
Inatsilli piareersaqqaarneqassammat inatsisip atuutilersinnissaata kinguartinnissaa siunnersuutigineqartoq, aningaasaqarnermut naalakkersuisup Pele Broberip tusagassiortunik ataasinngormat katersortitsinermi oqaatigaa.
AAMMA ATUARUK Naalakkersuisut tamarmiullutik innarluutilinnut tunngassutillit susassaqarfigaat
Innarluutilinnut inatsit suliniutinik ukiumut 25 millionit koruuninik aningaasartuutaasartussanik imaqarpoq.
Pitsaanerusumik ikiorneqarneq innarluutilinnullu sullissivimmut aningaasaliineruneq
Aningaasat taakku innarluutillit ikiorneqarnissaannut isumassorneqarnissaannut nunarpullu tamakkerlugu innarluutilinnut sullissivimmut aningaasaliinerunermut ilaatigut atorneqassapput.
Aningaasanut inatsisissatut siunnersuummi saqqummiunneqartumi innarluutillit pillugit inatsisip 2020-mi atuutilernissaanut aningaasanik immikkoortitsisoqarpoq. 2019-imi atuutilernissaa pilersaarutigineqaqqaarpoq.
Inatsisip innarluutilinnut atugarissaarnerulersitsinissaata saniatigut Naalagaaffiit Peqatigiit innarluutillit pillugit isumaqatigiissutaata nunatsinni malinneqalerneranik qulakkeerinnissaaq.
AAMMA ATUARUK Naalakkersuisut tamarmiullutik innarluutilinnut tunngassutillit susassaqarfigaat
Kinguartitsisoqarneralu ajuusaarnartoq inunnut innarluutilinnut illersuisup, Christina Johnsenip, oqaatigaa.
- Inuit innarluutilinnut inatsisissap kinguartinneqarnissaa tusarlugu ajuusaarnartorujussuuvoq. Qangali utaqqineqarpoq. Massakkut inatsisiusoq nutaanngitsorujussuuvoq, ullutsinnullu naleqquttuunani. Inatsisissaq nutaaq massakkut inuit ikiorserneqarnissaminnut pisinnaatitaaffileqarnissaannik periarfissiivoq. Inatsisimi massakkut atuuttumi allaqqaannarpoq, periarfissaavoq. Kisianni ukua oqaatsit marluk: periarfissaq taavalu pisinnaatitaaffik, taakkua kimeqartorujussuunerat malunnarpoq, inunnut innarluutilinnut illersuisoq Christina Johnsen oqarpoq.
