Innaallagisserisunngorniat arlaannaalluunniit angusinngitsoortoq
- Kalaallit Nunaani inuusuttut ilinniarfiini arlalinni pissutsit killiaffiat innaallagissamut atortunik ikkussuisartut iliuuseqaratik isiginnaaginnarsinnaajunnaarpaat. Taamaattumik suliassaqarfimmi tamatumani suliffiutillit arlallit pissutsit aarlerinartut sukumiisumik oqaluuserisimavaat, Torben Nielsen ilaatigut allappoq.
Ajornartorsiutip alliartorsimaneranut pissutaasut tunngaviusut marluusut, taakku tikkuartorpaat:
Meeqqat atuarfiata ataatsimut isigalugu pitsaanngitsup tungaanut ingerlasimanera, innaallagissamut atortunik ikkussuisartut naapertorlugit, ukiorpassuit atorlugit iluarsiniagassaalersussaq. Tassami ilikkassagaanni matematikimi danskisullu angusarissaarnissaq pisariaqarmat, tassungalu atatillugu atuartorpassuit piginnaanikippallaarnerarneqarlutik.
Ajornartorsiullu annertuup aappaa tassaavoq ilinniartut sulilernissamut piareersimasannginnerat imaluunniit suliffeqalernissamut naammaginartumik inerisimasannginnerat, naak aallaqqaataani piumasaqaatit tunngaviusuinnaat piumasaqaataasaraluartut.
- Sooq atuarfimmi atuarneq pitsanngorsarniarlugu qangarsuarli iliuuseqartoqarsimanngila? Tamatumunnga pissutaanerluni pissutsit ajorluinnartumut ingerlanerat inuiaqatigiittut takorusunnginnatsigu? Innaallagissamut atortunik ikkussuisartut ilaatigut aperipput, naqinnernillu ilisarsisinnaannginnermut Nunatsinni misissuisoqartarsimannginnera ilaatigut tikkuartorlugu. Tassami ilisimatuussutsikkut misissuinerit tamarmik takutimmassuk inuiaqatigiinni tamani innuttaasut 10 procentii naqinnernik ilisarsisinnaanngitsut.
Saviminilerinermi Ilinniarfimmi ajornartorsiutit meeqqat atuarfiata ingerlanerlunneranut takussutissaaginnarani, Saviminilerinermi Ilinniarfimmi ilinniartitsisunik piginnaaneqarluartunik amigaateqartoqarneranut aamma takussutissaasoq, innaallagissamut atortunik ikkussiusartut ilaatigut oqaatigaat.
Saviminilerinermik Ilinniarfiup aqutsisui suliffeqarfiutillillu isumaqatigiissutigaat ilinniartut tunngaviusumik atuartinneqartarnerat sivitsorneqarneqartariaqartoq, soorlu aamma ilinniartitsisut akissarsiamikkut atugaasa pitsaanerulernissaat ujartorneqartoq. Ilinniartitsisut piginnaaneqarluartut atuarfimmit taamaasillutik pissarsiarineqarsinnaalissagaluartut, Torben Nielsen, suliffeqarfiutillit sinnerlugit ilaatigut allappoq.
