Innaallagissap aqqutaa ikuallattoornermut peqqutaasimassangatippaat

Ikuallattoortoqarmat Nuup ilarujussua innaallagiaaruppoq, inissiarsuilli ilaanni innaallagissamut sakkortusaavimmik inissiisarneq ulorianartortaqanngitsoq, Nukissiorfimmit oqaatigineqarpoq.

Pisiniarfeqarfissuup Nuuk Bycenterip sananeqarnera innaallagiatornartorujussuuvoq, innaallagissamillu pilersuivimmik tapertaasussamik Nukissiorfiit Blok 1-imi pilersitsipput, taannalu ikuallatoornermut pissutaaqataasimasinnaavoq.

- Innaallagissamut sakkortusaavimmik ikkussineq innaallagissap aqqutaani attuuttoornikkut sarfaarutsitsisimasinnaavoq. Apeqqutaavorlu tamanna qangalili pisimanersoq, imaassinnaavormi sivisuumik taamaaleqqajaasimasoq, Kristin Isholm oqarpoq.

Sakkortusaavimmut atatillugu malittarisassat malinneqarsimanissaat, nakkutilliinerillu pissusissamisoorsimanissaat, Nuummi Nukissiorfiit isumaqarput.

Nuuk Bycenterip sananeqarneranut atatillugu sakkortusaavimmik Blok 1-ip eqqaani inissiineq attuuttoornikkut sarfaarutsitsisimasinnaava?

- Sakkortusaavik tapertaasussaq ikkussimanngitsuugutsigu imaassinnaavoq ukiup affaa qaangiuppat attuuttoornikkut sarfaaruttoorsimasinnaasoq, ikuallattoortitsillunilu, Kristin Isholm Nukissiorfinneersoq oqarpoq.

Blok 1-imi innaallagissamik pilersuiffik ikuallattoorfiummat ilaqutariit qulinnguani najugaqartut ernumalerput, Kristin Isholmilli oqaatigaa ernumassutissaqanngitsut.

- Innaallagissamik pilersuiffik Blok 1-imiittoq immikkut isumannaallisagaavoq, ikuallattoortoqassagaluarpat inneq siaruaassinnaassanani, Kristin Isholm, Nuummi Nukissiorfinneersoq oqarpoq.

Sakkortusaaviup ikuallaleraluarneranut pissutaasoq suunersoq Nuummi politiit oqaatigisinnaannginnerarpaat, maannali misissuisoqaleruttornerarlugu.