Inissiarpassuit ussiittut

Sineriammi tamarmi illorpassuit nutaanngilingaaramik aserfallassimangaaramillu ussiittupilussuupput. Illu Sarfannguaniittoq ilinniartitsisunut atugassiaq inugiligaasa najuleraluaannarlugu qiianangaarmat qimattarsimavaat. Illumi oqorsartariaqalivissimasumi ukiut sisamaat avillugu najugaqarnerminni Qeqqata Kommunianut naammagittaalliortaraluarlutik aallartariaqarsimasut ilagaat meeqqat atuarfianni ilinniartitsisoq, Jens Jørgen Jensen.
Allattoq Najaaraq Egede
oktobarip 15-at 2009 12:28

- Oqorsaasersornera ajuikkami silap nillertittalernerani nillertaqaaq. Nateq, iikkat igalaallu saavi aamma oqorsagaanngimmata allatut ajornartumik isersimassagutta oqorsarluta skuulersorlutalu angerlarsimasarpugut, Jens Jørgen Jensen oqarpoq.

Jens Jørgen Jensenip nuliatalu mikisunik meeraataarutereerlutik illu 1998-imit 2001-imut najorpaat. Naallu illup qiianarnersua pillugu Qeqqata Kommuneanut Teknikkimut immikkoortortaqarfianut saaffiginnittuaraluarlutik, najugaat usseeqisoq iliuuseqarfineqarneq ajorpoq.

- Niaqorlukujunnerit, nappaqqajaanerit atorpavut - nillertumiittuarlunimi peqqinnannginnami,

Teknikkimut immikkoortortaqarfimmut saaffiginnilluni allaanngilaq matumut oqaluussiinnarluni, Jens Jørgen Jensen oqarpoq.

Issileruttornerani illup kiassarniarneranut orsussaq 90 liiteri angullugu sapaatip-akunneranut atortariaqartarsimavaat. Maannali illu qujanartumik atoqqusaajunnaarsimanerarpaa.

- Illu najugaqarfigineqarsinnaanngitsutut nalilerneqareerpoq aamma tassani illumi kingullermik najugaqaleraluartup naammagittaalliutigiuarsimagaluarpaa, kisianni Teknikkimut immikkoortortaqarfimmiut soorlu siutaat matoqqasut, Jens Jørgen Jensen oqarpoq.

Jens Jørgen Jensen, Sarfannguani atuarfimmut uteqqissimalersoq unnersiorpoq, illu alla maanna najugartik assut kiassaruminarnerusoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq