INI: Tillinnerunngilaq

Taamali sivikitsigisumik piffissaliilluni ilimasaarinerup ilaqutariit ilaannut sipaartariaqartunut kinguneriumaagai, inissiaatileqatigiifiup pisortaanerata oqaaseqarfiginagit, malittarisassanik malinninnertik innersuussutigiinnarpaa.

Ulla Larsen juulip kiassarneqarnerminnut qaammammut 2.000 koruunit sinnerlugit akiliisalertussaq aallartiffigeriartigu.

- Allagarsigatta tupattorujussuuvugut, taama angitigisumik kiassarnermut akiliutitta qaffanneqarnissaa paasigatsigu. Misigisimavunga kingusinaarlutik kalerriutigigaat, inissiaatileqatigiiffiup INIp inaataasa ilaanni najugalik, Ulla Larsen oqarpoq.

Taassuma ilaqutaasalu inigisartik 89 kvadratmeterisut angitigisoq, Nuummi Ole Brandtip Aqutaaniittoq 2010-mi pisiaraat, sulili INI A/S-imit kiassarnikkut sullinneqarlutik.

Ilaqutariit kiassarnermut akiliutigigallartagaat qaammammi tullermiit 2.055 koruuniulissapput, tassalu kiassarnerinnarmut ukiumut 24.660 koruunit aningaasartuutigissassallugit.

- Qaammatit pingasut siusinaarlutik kalerriutigisuuppassuk eqqortuunerussagaluarpoq, Ulla Larsen oqarpoq.

Tamatumunngalu inissiaatileqatigiiffik A/S INI-mi pisortaaneq Jukku Mølgaard akissuteqarpoq.

- Attartornermut isumaqatigiissummi allaqqavoq, kiassarnermut akiliutaagallartut sapaatit akunneri pingasut sioqqullugit iluarsiivigineqarsinnaasut, Jukku Mølgaard oqarpoq.

Jukku Mølgaard aperaarput meerartallit pissakinnerusulluunniit, INI A/S-ip qaffaanissamik ilimasaarilerami eqqarsaatigisimannginnerai. Apeqqulli akinagu, inissiaqarfinni kiasarnermut aningaasartuutit attartortunit agguatarneqartussaasut nassuiaaginnarpoq.

Kisianni aamma nassuiaavoq, akiliutaagallartartut maanna qaffanneqanngippata, attartortut kingusinnerusukkut akileerujussuartariaqalissagaluartut.

- Aappaagu kiassarnermut naatsorsuutissat, naammassineqarlutik nalunaarutiginnittoqarpat annertoorujussuarmik tapertoqannginnissaa anguniarlugu taamaasiorpugut. Tillinniarsinnatitaanngilagut aamma taamaaliorsinnaanngilagut, kiassaateqarfinni aningaasartuutaasimasut aallaavigalugit taakku aningaasartuutit attartortunut ingerlateqqinneqarput. Taamaattumik aningaasat amigaataasussat, akit qaffakkiartorneri peqqutigalugit matussusissagutsigit allamik aqqutissaqanngilaq, taakku atuisuusut akilertariaqarpaat, INI-mi pisortaaneq Jukku Mølgaard oqarpoq.

Akiliutaagallartunik qaffaanissaq taama kingusitsigisukkut attartortunut nalunaarutigineqarmat, Ineqartut Peqatigiiffiisa Kattuffianniit naammaginneqanngilluinnarpoq.

- Nalunngilarput uuliap akia qaffanneqartoq, kisianni aamma ikuallaavinnit kiassarneqartunut allaat aamma taamatorluinnaq pimmata naammaginngilluinnarparput, IPK-p siulittaasua Marie Nielsen oqarpoq, taassumalu inissiaatilieqatigiiffik attaveqarfigereersimavaa.

INI A/S ilisimatitsivoq, naak kiassarnermut akiliutaagallartut malunnarluartumik maanna qaffattussaagaluartut, aningaasartuutit aappaagu upernaakkut naatsorsorneqarneranni imaassinnaasoq aningaasat naammanngitsut.

- INI kiassarnermut akiliutaagallartunik qaffaavoq saniatigullu kiassarnermut naatsorsuutit ukiumoortut 2013-imi suliarineqareerpata qaffaaqqissinnaaneq siumoortumik nalunaarutigalugu, INI A/S nittartakkamini allappoq.

INI-p suli oqaatigisinnaanngilaa, ininik attartortut kiassarnermut qanoq akiliinerutigissanersut, kisianni inissianni INI A/s-ip ingerlataani 10.000-usuni siorna siormoortumik akiliutit 106 millionit koruuniupput. Tassalu akiliutit 50 procentimik qaffappata, qaffariaat 50 millioni koruuniukutsoorsinnaavoq.