INI-p akiligassanik akiliiniaasaartarnera Atassutip isornartorsiorpaa
Taassuma § 37 naapertorlugu apeqquteqaammini inissiaatileqatigiiffiup piffissaq eqqorlugu akiliisannginnera uparuarpaa.
- Sanasut, ruujorilerisut assigisaallu akiligassanik nassiussigaangata A/S INI sivisoorujussuarmik akiliiniaasaartartoq paasivarput.
- Taamaammat taamatut apeqquteqaateqarpugut, allatulli akiliinissamut killiliussat malillugit akiliisarnissaat anguniarlugu, Gerhardt Petersen KNR-imut oqarpoq.
Qaammatinik arfinilinnik kinguaattooruteqartarneranut assersuutissanik takusimanerarpoq, tamannalu suliffeqarfeqqaanut sivisuupilussuuvoq.
Seks procentiinnai kingusinaartumik akilerneqartartut
INI A/S-ilu kingusinaarluni akiliisarnini tunngavilersorpaa, akiligassatik sanasut kingusinaarlutik tunniuttarmatigit.
- Akiligassat 94 procentii piffissaq eqqorlugu akilerneqartarput taavalu immaqa seks procentii kingusinaartumik akilerneqartarlutik. Soorunalimi seks procenti naammaginanngilaq, taamaammat pitsanngorsaaqqinnissarput suli anguniarparput, INI A/S-imi attaveqaqatigiinnermut pisortaq Else Løvstrøm oqarpoq.
Erseqqissaatigaa sanasut ilaasa pisiniummut uppernarsaatit kingusinaarlutik, ilaannilu amigartumik tunniussisarnerat pissutaasoq.
- Suliffeqarfiit ilaasa rekvisitionit katersoqqaarlugit fakturanik nassiussisarput. Ilaasali rekvsitionertaqanngitsunik fakturanik nassiussisarput, akilerneqassappalu pinngitsoornatik rekvisitioninik uppernarsaateqaqqaartussaallutik, Else oqarpoq.
Gerhardt Petersen apeqqummi paragraf 37 naapertorlugu ilannguppaa, susassaqaqatigiit tamarmik A/S INI Boligselskab siulersuisuini issiatitaqartuuppata pitsaanerussannginnersoq, tassuunakkut ajornartorsiut aaqqinneqarniassammat.