INI-mi pisortamik soraartoqaqqippoq

Siorna decembarip qiteqqunnerani, inissianut aqutsinermut pisortaq, Jeanette Holding, qaammatit quliinnaat pisortaareerluni tunuarpoq. Inissiaatileqatigiiffiullu A/S INIp, tunuarnera sumik peqquteqarnersoq oqaaseqarfigerusussimanngilaa.

Marsimi aamma nalunaarutigineqarpoq, pisortaaneq Kenneth T. Hansen, tunuartoq.

- Misigisimagama, inuuninni nutaanik unammillernartunik misileraasariaqarlunga, tunuarnini taama oqaasertalerpaa.

Qaammatillu naanerani siulersuisut ataatsimiipput. Siulersuisunilu siulittaasuusimasup oqaatigaa, politikkikkut ilunngersuussisoqannginnera naammagiunnaaritsik.

Maannalu pisortatut atorfilik aamma tunuarpoq. Tassalu Sven Pedersen.

Tamannalu illugiinni isumaqatigiinnikkut, sapaatip akunnerata siuliani pisoq, pisortaanerugallartup Jukku Mølgaardip oqaatigaa. Annerusumillu oqaaseqarsinnannginnerarluni.

Siulersuisuni siulittaasunngorlaap Lissi Olsenip tamanna aamma oqaaseqarfigerusunngilaa, aaliangiisinnaasutuatullu Jukku Mølgaard tikkuartorpaa, siulersuisunilu tamanna eqqartorneqarsimannginnerarlugu:

- Taamaammat siulersuisut tamanna akuleruffiginianngilaat, Lissi Olsen oqarpoq.

Ineqarniarnerullu allaffeqarfiani pisortatut, ineqarfinnullu aserfallattaaliinermut pisortatut atorfiit kattunneqarlutik taakkunani suliassat pisortamit ataatsimit ingerlanneqartalernissaat siunertarineqartoq Lissi Olsenip oqaatigalugu.

Atorfilli nutaaq siuliani eqqaaneqartoq Birte Kielsenip pissarsiarereerpaa. Nutaamilli inuttaleqqinneqassanersoq suli qulakkivinneqarsimannginnerarlugu siulittaasunngorlaap oqaatigaa:

- Atorfinittitsisarnerput unitsinneqareernikuuvoq, qullersassatullu inuttassarsiuussisarnerit siulersuisut isumagisalissagaat piumasarereerparput. Ilami inissiaatileqatigiivittut ingerlalernissarput Namminersorlutik oqartussat piumasareerpaat, taamaammallu suliassat allaanerusumik ingerlanneqarsinnaanersut tamatumunngalu atatillugu allannguutaasinnaasut pilersinneqartarnissaat kingunerusinnaalluarluni.

Lissi Olsen oqarpoq nangillunilu:

- Tassa atorfiit suli inuttalerneqarsimanngikkunik sulisussarsiortartunik tassa headhunterinik attartornissaq pisariaqanngilaq, siulersuisummi tamanna ingerlattussaavaat, iluaqutigisussaassallugulu. A/S INI-p siulersuisuini siulittaasoq Lissi Olsen taama oqarpoq.

Siulersuisunngorlaat maajip qiteqqunnerani ataatsimeeqqaarfissiornissaat Lissi Olsenip oqaatigaa, tamatumalu siuliani sumilluunniit aaliangiisoqassanngitsoq naqissuserlugu.

Sven Pedersen ullaap tungaani attaveqarfiginiaraluaratsigu iluatsinngitsoorparput.