INI A/S-ip siulersuisuni taarsiineq

Taava piginneqatigiiffinni Namminersorlutik Oqartussat pigisaanni, INI A/S ataatsimeersuarneq tulliuvoq, tamannalu Sisimiuni ippassaq pivoq.

Namminersorlutik Oqartussat pigisaanni amerlanerni soorlu taama pisoqartoq, tassani aamma siulersuisunik taarsiinissaq, Naalakkersuisut siulittaasuata aalajangerpaa.

Siulersuisuni ilaasortani, Namminersorlutik Oqartussanit toqqarneqartuni sisamani, siulittaasoq Jette Larsen kisimi ingerlaqqippoq.

Siulittaasup tullia Kristian May taavalu Lissi Olsen Bjarne Krog-Jensenilu ilaasortaajunnaarput. Lissi Olsen siornamut INI A/S-imi siulersuisuni siulittaasuugaluarpoq, ukioq mannalu toqqaanermi qinigasanut ilaanngikkaluarluni, Aleqa Hammondili naliliisimavoq, nukiit nutaat pitsaanerussasut.

Naallu Jette Larsen siulittaasutut ingerlaannartitaagaluarluni, taarsersuinermut ugguarpoq.

- Siulersuisuni siulittaasutut oqarusuppunga, taamaaliorneq soorunami ugguarnartoq, kisianni kikkut siulersuisuniinnissaat piginnittut kiseqqinnaamik soorunami aalajangigassaraat. Tassa taamaappoq. Uagut tamanna annerusumik oqaseqarfigisinnaanngilarput, Jette Larsen oqarpoq.

Siulersuisunut ilaasortaajunaartunut pingasunut taarsiullutik Carsten Pietras,  Karin Bing Orgland aamma Jacob Abelsen ilaasortaalerput.

Inissiaatinik ingerlatseqatigiiffiup aningaasaqarnera piginneqatigiiffimmit ajunngitsuinnarmik oqaluuserineqaraluarpoq.

- 2012-imi 2,1 millionit koruunik amigartooriarluni piginneqatigiiffik ukioq manna 924.000 koruuninik sinneqartooruteqarpoq, INI A/S-ip pisortaanera Jukku Mølgaard taama oqarpoq.

2013-imi immikkuullarissunik isertitaqarsimanertik taassuma eqqaavaa.

- Tassa akiliutinit, taakkua 1,8 millionit koruuninik isertitsissutaasimammata. Taava aamma Sanaartornermi sullissinitsinnit isertitaqarneruvugut. Isertitsiffiit taakkua marluk 2013-imi iluanaaruteqarnermut peqqutaasut, Jukku Mølgaard oqaluttuarpoq.

Aleqa Hammondillumi tusagasiutinut nalunarnermini aamma erseqqissarpaa, siulersuisuni taarseerujussuarneq, siorna angusanik siulersuisulluunniit sulinerannik naammaginninginermik peqquteqanngitsoq.

- Naalakkersuisut sinnerlugit A/S Inissiaatileqatigiiffik INI 2013-imi suleqatigiilluarsimanermut qujaffigerusuppara. Naak pitsanngoriaatissaqartoqarsinnaagaluartoq, ingerlatseqatigiiffik naammaginartunik angusaqarsimammat nuannaarutigaarput. INI suli ineriartorpoq, siulersuisuni ilaasortaasimasut ineriartornermut tamatumunnga pitsaasunik tunniussaqarsimapput. Taakkununnga Naalakkersuisut nersorinnissutaat sulisimanerannullu qujassuteqaataat apuukkusuppakka, Aleqa Hammond oqarpoq.