Ingutsisarneq quianartut atorlugit akiorniarpaat
- Quianartunngortitsinikkut ajornartorsiutit ilaannut uisinneqarsinnaasarput, Qaasuitsup Kommunai kulturimut sunngiffimmullu suliani pisortaq Markus E. Olsen oqarpoq.
Taamaammat quiasaarisartoq Piitannguaq Alaufesen suleqatigalugu inoqatinik nakkarsaasarneq ingutsisarnerlu pillugit innuttaasunik ataatsimiisitsiniarpoq.
Ataatsimiisitsineq novembari aallartilaarpat pissaaq qulequtaralugu: Nakkarsaasarneq unitsilli!
- Ajornartorsiut taanna inuppassuarnik attuisarpoq aammalu ilimanarluinnarpoq Ilulissaniinnaanngitsoq Qaasuitsup Kommunianiinnaanngitsorlu tamanna ajornartorsiutaasoq, Markus E. Olsen oqarpoq.
- Ajornartorsiut ilungersunartorujussuuvoq tassami teqeqquni ingutsineq nakkarsaanerlu suliniuterpassuarni nukillaarsaataasarmata. Assersuussinnaavarput inuit tunuanniit kapineqartartut ilaatigummi paasinarsisarmat inuit ilaat eqqunngitsumik tusaamaneqalersimasut, Markus E. Olsen oqarpoq.
Taanna maanna innuttaasunik ataatsimiisitsiniarpoq Ilulissani kulturip illorsuani Sermermiuni pingasunngorneq novembarip aappaat. Ataatsimiinneq aallarnerlugu saqqummiussisoqassaaq akunniliullugulu eqqartorneqartut quinartunngorlugit Piitannguaq Alaufesen saqqummiussisassaaq, taamalu ajornartorsiut oqimaakkaluartoq ammasumik oqallisigineqarsinnaasunngorlugu.
- Quianartunngortitsisarneq assigiinngitsutigut misilittagaqarfigaarput taamatullu iliornikkut ajornartorsiut pillugu isit uisinneqarsinnaasarput, Markus E. Olsen oqarpoq.
