Ingerlatsinermut institutimi ilinniarsimasoq: Nalilersuisoqalernera iluarinarpoq

- Taamatut isummersimanera pitsaasutut isigaara. Isumaqarama pisariaqartoq. Ilinniartitsineq ilumut pitsaanersoq qangalili apeqqusertarpara, Nangaassuteqartarnikuugama, Niels Thomsen oqarpoq.

Taanna politikkikkut suliaqalinnginnermi siornatigut Namminersorlutik Oqartussani aningaasaqarnermut pilersaarusiorfimmi atorfeqaraluarpoq, Ilisimatusarfimmili Ingerlatsinermut institutimi ilinniartitaanerup qaffasissusaa ilaatigut apeqqusertarsimallugu.

Henriette Rosing Ingerlatsinermut Institutimi aamma ilinniarsimasuuvoq, Aningaasaqarnermullu Naalakkersuisoqarfimmi maanna atorfeqarluni. Taassuma Ingerlatsinermut institutimi ilinniarsimanini naammaginartutut nalilerpaa:

- Ilnniiakkakka naammaginarput, kisianni Ilisimatusarfimmi ilinniarneq soorunami sutigut tamatigut nalilersorneqartauartariaqarpoq, Ilisimatusarfimmi Ingerlatsinermut institutimi ilinniarsimasoq Henriette Rosing taama oqarpoq. Rektorip Tine Parsip misissuisitsinialernera taassuma tapersersornartoqartippaa, soorlu aamma Niels Thomsen taama isumaqartoq. Nalilersuinissarli siusinnerusukkut pisinnaasorisimagaluarpaa:

- Pitsanngortitserusussutsimik nipeqartoqarnera pitsaasutut isigaara, massakkulli aatsaat tamanna pilermat uggornarpoq, ajornartorsiut ukiualunni eqqartorneqangaatsiartarnikuummat, Ilisimatusarfimmi Ingerlatsinermut institutimi ilinniarsimasoq Niels Thomsen oqarpoq.