Inersimasut nakkarsaattarnerat Upernavimmi akiorniarpaat
Inuit Theater Company maanna Upernavimmiititsivoq isiginnaagassiaq 'Nunaqqativit ilagaatsit' takutikkiartorlugu. Isiginnaagassiaq pilersinneqarpoq inersimasut akornanni nakkarsaattarneq pillugu oqallissaarutitut.
Tamanna aallarniutaassaaq aqagu unnukkut nalunaaqutaq Upernavimmi Illu Sammisassaqartitsivimmi tamanut ammasumik oqallittoqarnissaanut.
- Meeqqat atuartut akornanni nakkarsaattarneq pitsaaliorniarlugu suliniuteqareerpugut. Kisianni eqimattat ilaannaat sullivigigaluaraanni iluaqutaarpiarnavianngilaq. Taamaattumik meeqqat inersimasullu tamanna pillugu suliniarfigineqassapput, Upernavimmi pitsaaliuinermut siunnersorti Ruth Larsen KNR-mut oqarpoq.
Taassuma oqaatigaa inersimasut akornanni nakkarsaattarneq Upernavimmi aamma pisartoq. Taamaammat oqallisaariniarput ajornartorsiutip angerlarsimaffinni aamma oqallisaanissaa anguniarlugu.
- Meeqqat tungaannut suliniarnitsinni ilaatigut nassuiartartarput qinngasaarneqarluni qanoq ajortigisoq, Ruth Larsen oqarpoq.
Isiginnaagassiaq 'Nunaqqativit ilagaatsit' meeqqanut atuartunut aamma aqagu takutinneqassaaq unnukkullu inersimasunut takutinneqassalluni.
- Inuit Theater Companyp illoqarfitsinnut tikinnera assorujussuaq nuannaarutigaarput. Illoqarfimmi anginngitsumi soorlu Upernavimmi sammisamut soqutiginninneq annerulersarpoq avataaniit tikittoqartillugu, Ruth Larsen oqarpoq.