Inersimasunut Pisiffimmi suleqatiminnut inuusuttunut ilitsersuissasut
![](/sites/default/files/styles/image_934x467/public/2024-05/JPG%20Mentorer%20fra%20hele%20landet2.jpg?itok=ZufPqDFs)
![](/sites/default/files/styles/image_934x467/public/2024-05/JPG%20Mentorer%20fra%20hele%20landet3.jpg?itok=OXX9GRkd)
![](/sites/default/files/styles/image_934x467/public/2024-05/JPG%20Mentorer%20fra%20hele%20landet4_0.jpg?itok=_5eI-hMb)
![](/sites/default/files/styles/image_934x467/public/2024-05/JPG%20Mentorer%20fra%20hele%20landet5.jpg?itok=Fh-nxUoR)
![](/sites/default/files/styles/image_934x467/public/2024-05/JPG%20Mentorer%20fra%20hele%20landet6.jpg?itok=_7wGJNqX)
![](/sites/default/files/styles/image_934x467/public/2024-05/JPG%20Mentorer%20fra%20hele%20landet1.jpg?itok=0a3DMyrb)
Pisiffimmi sulisut 22-t suleqatiminnut inuusuttunut mentoriulissapput.
Pisiffik Unicefilu tusagassiuutinut nalunaarummi ataatsimut allapput, taakkulu sulisunik mentoritut aatsaat ilinniartoqarnera oqatigaat.
- Pisiffimmi sulisutsinnut inuusuttunut mentorit siulliit ilinniarsimasunngorneri nuannaarutigalugulu tulluusimaarutigaara, Pisiffiup pisortaanera, Per Steen Larsen oqarpoq.
Tapersiineq atugarissaarnerulersitsissasoq
Suliniut Pisiffimmi inuusuttut taperserneqarnissaannut ilitsersuinissamillu siunertaqarlunilu inuusuttut suliffimmi atugarissaarnerulernissaannik neriuuteqarneruvoq, taakku tusagassiuutinut nalunaarummi allapput.
- Pisiffimmi inuusuttut suliffeqarfitsinni ineriartorluarnissaannut ikiorniarpagut, ilinniarnissaannut suliffeqaannarnissaannullu kajumissaarlugit – suliffimmi qaffakkiartornissamut tunngavilerniarlugit. Taamaammat mentoreqartitsineq UNICEF peqatigalugu pilersipparput, Pisiffiup pisortaanera, Per Steen Larsen nassuiaavoq.
Unicef Pisiffiup suliniutaanut tapersiilluni suleqataavoq, angusallu nunatsinni Unicefip suliniutaani aqutsisup Tina Damip nuannaarutigai.
- Pisiffiup – mentoreqartitsilernerminni aammalu meeqqanut inuusuttunullu isiginnittariaaseqalernerminni inuusuttut pisinnaatitaaffiinut siunissaannullu akisussaaffimmik tigusinerat nuannerpoq, taanna tusagassiuutinut nalunaarummi oqarpoq.
Tamanut inissaqartitsineq
Suliniutip Naalagaaffiit Peqatigiit meeqqat pisinnaatitaaffii pillugit isumaqatigiissutaannik tunngaveqarpoq, Pisiffiullu pisortaanerata, Per Steen Larsenip tamanna eqqortumik aqqutissaasoraa.
- Pingaartumik inuusuttut atugaat ineriartornerallu suliaqarfiginerini isumaqarpunga Kalaallit Nunaanni suliffeqarfinni pitsaanerpaanissatinnik anguniagarput angusinnaagipput. Meeqqanut inuusuttunullu politikkitta pitsaanerulernissaanik ataavartumik suliaqarnitsinni pisussaaffigaarput suliffimmi avatangiiseq, sulisut ataasiakkaat atugarissaarnerulernissamut iluatsinnissamullu periarfissaqalersitsisoq, pilersissallugu.
Pisiffik suliffimmik tamanut naleqartitsisumik pilersitsinissamut arlalinnik suliniuteqarpoq. Taamaammat inuit innarluutillit ikiornissaannut ilaatigut aamma suliniuteqarpoq.
- Tamanut suliffissaqartoq eqqarsarpugut, taamaammat inuit timikkut tarnikkulluunniit innarluuteqaraluarpata ikiornissaat suliffeqarfitsinni aamma pingaartilluinnarparput, Pisiffimmi sulisoqarnermut pisortaq, Naasunnguaq Berthelsen oqarpoq.
Assersuutissatsialak
Taamaammat pisiffiup inuit timikkut tarnikkulluunniit innarluutillit 16-it illoqarfinni arfinilinni maanna sulisorivai.
Helga taakku ilagaat. Taanna ilinniarnerminik naammassinninniassammat Nuummi Elgigantenimi ilinniartorineqarpoq, kingornalu Qinngorpumi Pisiffimmi sulilerluni. Taanna Pisiffimmi allaat nersorniarneqarsimavoq, inortuinngisaannarlunilumi napparsimanikuusimanngilaq.
Taanna piumassuseqaraanni aqqutissaqarneranut assersuutissatsialaat ilagaat.
- Isumaqarpunga suliffimmi avatangiisigissaaneq sulisut nalerisimassusaannut suliaqarluarsinnaanerannullu aalajangiisuusoq. Aqutsisugut pikkorissut, suliffeqarfillu inissaqartitsillunilu peqataatitsitsoq aqqutigalugit, piffik kikkunnut tamanut naleqartitsisoq ataqqinniffiusorlu anguniarparput, Pisiffiup pisortaanera tusagassiuutinut nalunaarummi naggasiivoq.