Special Olympics Idrætfestivaliimi peqataaneq: Ineriartornikkut innarluutilinnut isumalerujussuaq

Special Olympics Idrætsfestival Danmarkimi ineriartornikkut innarluutilinnut timersornermik aaqqissuussani annerpaavoq. Ukioq manna timersornermik sammisaqarluni maajip 29-aniit 31-ata tungaanut katerisimaarfiuvoq, tassanilu Nunatsinneersut 21-t unammeqataaqqaarput.

Unammeqataasut ilaat 24-nik ukiulik Jørna-Marie Larsen timersornermi misilittagaqarluarpoq, taannami ineriartornikkut innarluutilinnut nunarsuaq tamakkerlugu unammiuaarnerni, Special Olympics World Winter Gamesimi, Italiami pisumi sisoraarnermi siorna kuultinnappoq.

Jørna-Marie arpannermi arfininngormat unammeqataavoq, unammeqataanissaminullu sungiusarluarsimavoq.

-Kangerlussuaq kiatsimmat arpallattaalernernikuuvunga tassani, sapaatit akunnerat allortarlugu.

Timersornermik katerisimaarneq maajip ulluisa 29-ani ammarnersiorneqarpoq, maajilli ulluisa 30-niik 31-ata tungaanut timersornerit aatsaat aallartipput.

Jørna-Marie Larsen unammeqataanissaminut qilanaarsimasoq neriuuteqarluarpoq.

-Angusaqarusullunga neriuuteqarpunga, angusaqarluassallunga.

Ineriartornikkut innarluutilinut peqataaneq iluaqutaassasoq

Special Olympics timersornermik katerisimaarfik inunnut 16-it sinnerlugit ukiulinnut ukioq allortarlugu unammisitsisarpoq. Inuit innarluutilinnut ikorfartortsit ilanngullugit 1.200 missaaniittut katerisimaarfimmi ukioq manna peqataapput.

Unammiaqataasunut ikorfartortsit ilaat Sisimiuneersoq Markus Halsøe unammiaqataasunut aqqanilinnut angallasseqataavoq. Taassuma innarluutillit nunarput qimallugu angalanerat qiimmaallaataasoq oqaatigaa.

- Allamut nikisilaarnerat allanik naapitsilaarneq taamaaqatinik, inuttut assorsuaq isumaqassaaq. Nukerujussuarmik tunisissaaq.

Special Olympics timersornermik katerisimaarnermi nunatsinneersut ilaajuaannarnissaat Markus Halsøep neriuutigaa.

-Neriuutigaara ukioq una aallartittoq peqataaneq siulleq unissanngitsoq.

Markus Halsøellu illersuinissani qularinngilaa.

-Illersuissaagut tamannguatta qularnangilaq, tamaavitta tamatta illersussavagut. Allamiuugaluarpattaluunniit qiimmassarluta pissaagut.