Ineqartut oqoqarneranik pasitsaassallit nalunaaqquneqarput
Inissianik attartortut oqarasuaatikkut, allakkatigut imaluunniit inissiaatileqatigiiffiup A/S INI-p nittartaagaatigut saaffiginnissinnaasut INI-mit nalunaarutigineqarpoq.
Saaffiginnittoqareerpat A/S INI attartortumut takuniaassaaq, inissiamilu oqoqarneranik misissugassamik tigusillutik.
Misissugassaq Danmarkmi Teknologisk Institut-imut nassiunneqassaq, inissiamilu oqoqartoq paasineqarpat, inissiap suliarineqarnissaanut inissiaatileqatigiiffik A/S INI aallartitsissaaq.
Inissiami oqoqartoq paasineqarpat, inissiani immikkoortortaqarfiit aningaasaqarnerat aallaavigalugu pitsanngorsaataasinnaasunik suliniuteqartoqassaaq.
Annertuumik oqoqartoq paasineqarpat, inissiap iluarsaanneqarnerata nalaani, najugaqartut allamut nuunneqarallarsinnaapput.
A/S INI-p nuna tamakkerlugu siorna paasisitsiniianera ”Oquk akiorniarlugu suliniummik” taagorneqartoq, innersuussutigineqarpoq. Attartortut namminneerlutik angerlarsimaffiup iluani peqqinnartumik silaannarissuutitsinissaminnik periarfissaqarluarnerat, paasisitsiniaanermi oqaatigineqarluni.
Inissiat aalamit isugutsertarneri annertunngitsumillu oqoqalersimappat eqqiaanermi akuutissat aaliangersimasut naleqquttullu atortarnissaat, paasisitsiniaanermi pinaveersaartitsinermi erseqqissaatigineqarput.