Ineqarnermut akiliutit qaffanneqarnissaat unitsikkallarneqarpoq
Naalakkersuisut suliassamut aningaasassarsinissamut aaqqiissutissat allat misissorniarpaat, taamaalilluni ineqarnermut akiliutinik qaffaanissaq pilersaarutigineqartoq pinngitsoorneqarsinnaassalluni.
- Uppernarsarsinnaavara uanga imaluunniit Naalakkersuisut sinneri, ineqarnermut akiliutinik pisariaqavissut saniatigut qaffaanissamik siunertaqannginnatta, Naalakkersuisunut ilaasortaq, Jens B. Frederiksen oqarpoq, nangillunilu:
- Inissiaateqarneq Kalaallit Nunaanniit 80-ikkunni tiguneqarmat, ineqarnermut akiliutit appasitsinneqartut iliuuseqarfiginissaannut politikkikkut qunusuissutsip pisariaqartinneqartup amigaataanera malunnarsimavoq. Taamanili aserfallatsaaliuinissamut akiliuteqartitsinissaq aamma aningaasat amerlanerusut immikkoortinneqartariaqarnerat takuneqarsimasariaqaraluarpoq. Tamanna pisimasuuppat ullumikkut pissutsit atorsimassanngikkaluarpagut. Akisussaassuseqannginneq tamanna ingerlatiinnassagutsigu, qitornavut iluarsaassinissamut kinguaattoorutinik qaangeruminaatsunik maannatut imaluunniit ajornerusumik atugaqalertussaapput, ineqarnermut naalakkersuisoq tusagassiuutinut nalunaarummini ilaatigut taama oqarpoq.
Ineqarnermut akiliutit siunissami qanoq qaffasissuseqassanersut oqallisigineqassasoq Naalakkersuisut kissaatigaat.
- Kisiannili politikkip ingerlatatta allanngortinneqarnissaa kissaatigineqarpat, aamma aserfallatsaaliuinermi iluarsaassinermilu kinguaattoorutit ajornartorsiutaanerat qanoq iliorluni qaangerneqarsinnaanersut siunnersuuteqartoqartariaqarpoq, Jens B. Frederiksen oqarpoq.
Inatsisartut upernaakkut ataatsimiinneranni Naalakkersuisut inissianik iluarsaassisarnissamut siunissami periusissamut isummernissamut tunngavissiamik saqqummiussissamaarput.
