Ineqarnermut akiliutit qaffangaatsiassapput
Nanortalimmiit Qaanaaq tikillugu illut ilaqutariinnit ataasiakkaanit attartorneqartut 400-t missaanniittut 51 procentimik qaffaaffigineqassapput, tamanna pissaaq Namminersornerlutik Oqartussat INI A/S-mut kaammattuereerneritigut.
Illunik attartortut ineqarnermut akiliutip qaffanneqarnera pillugu allagarsisinneqareerput, allakkamili nassuiarneqarsimanngilaq sooq qaffaasoqarniarnersoq.
Illunut ilaqutariinnit ataasiakkaanit attartorneqartunut akiliutit, assersuutigalugu qaammammut 4173 koruuneqartut, qaammammut 6618 koruuneqalissapput. Tassa qaffariaat qaammammut akunnaallisarlugu 2500 koruuniussaaq.
INI A/S-mi pisortaq, Kenneth T. Hansen oqarpoq qaffaanermut tunngavigineqartut marluusut.
- Illunut ilaqutariinnit ataasiakkaanit attartorneqartunut akiliutit qaffanneqarnerat aserfallatsaaliuinissamik aningaasanillu pisariaqartitsinermik aallaaveqarpoq.
- Aamma illut ilaqutariinnit ataasiakkaanit attartorneqartut akii appasittuaannarsimapput. Aammami inissiani najugaqartut qaammammut akiliutigisartagaasa appaseqataannik akiliisarnissaat naammanngilaq, INI A/S-mi pisortaq Kenneth T. Hansen oqarpoq.
Aserfallatsaaliunermut aningaasartuutit tapiissutinit matussuseqarnissaat aqqutissaanngitsoq, Ineqarnermut naalakkersuisoq Jens B. Frederiksen oqarpoq.
- Nunatta Karsia aningaasaqarnikkut annertuunik arlalinnik unammilligassaqarpoq, taamaattumillu illut taakku aserfallatsaalinissaannut tapiissuteqarnissamut periarfissaqanngilaq, aamma sapinnginnerit ajornarnerusunik nammagassaqarnissaat pingaaruteqarpoq, Ineqarnermut naalakkersuisoq Jens B. Frederiksen oqarpoq.