Ineqarnermut akiliutinik qaffaanissaq taamaatinneqariaannaavoq
Inissiat illullu oqummik eqqugaasut iluarsaanneqarnissaannut million koruuninik akeqartussatut missiliuunneqarput.
Ineqarnermut Naalakkersuisup Jens B. Frederiksenip inissiat attartorneqarnerinut akiliutit qaffanneqarnissaannut nalunaarut utertissallugu oqarpoq.
Oquup akiorniarneranut aningaasartuutit allatigut nassaarineqarsinnaanersut Jens B. Frederiksenip isumaliutersuutigaa.
- Qaffaanissamut isornartorsiutit tusaavakka, uannulli pingaarnerpaavoq, peqqinnissamut ulorianaatillip oquup akiorniarneqarnissaa, Jens B. Frederiksen KNR-imut ullumi oqarpoq.
Naalakkersuisut ataasinngorpat ataatsimiilerpata inissianut akiliutit qaffanneqarnissaannut nalunaarutip oqaluuserineqarnissaa Jens B. Frederiksenip piumasariniarpaa.
INI a/s-ip inissiaataanni init attartorneqarnerinut akiliutit qaammammut 500koruuninik aamma 1000 koruuninik qaffanneqarnissaat inatsisartuni ilaasortanit isornartorsiorneqarpoq.
Inissiat attortornerinut akiliutit qaffanneqarnerinut periuserineqartoq, inatsisartuni ilaasortat Hans Aronsenip IA-meersup Malik Berthelsenillu Siumumeersup apeqquserpaat.
Inatsisartuni inatsisit pillugit ataatsimiititaliami siulittaasup Isak Hammondip akitsuinissamut nalunaaruteqarneq isornartorsiorpaa. Aamma eqqartuussissuserisoq Lissi Olsen piffissami kingullermi ilaatigut ima oqaaseqarpoq:
- Najugaqartut oqartussaaqataanerat aamma najugaqarfiit immikkoortortaqarfiisa inssianut akiliutinut sunniuteqarsinnaanerat atortinneqanngilaq, Lissi Olsen oqarpoq.
Inissianut akiliutit qaffanneqarnissaat maajip aallaqqaataaniit atuutilersussatut nalunaarutigineqarpoq.
Qaffaanermit isertitat ukiuni marlunni tulliuttuni 26 millionit koruuninik isertitsissutaanissaat naatsorsorneqarsimavoq.