Ineqarnermut akiliut 5,5 procentimik qaffassaaq

Pisortat ininik attartortittagaanni ineqarnermut akiliutit qaffaatissaat ilimasaarutigineqarsimasut pillugit maanna kisitsisit siulliit tigussaasut saqqummiunneqarput. Ineqarnermut akiliutit qaffaatissaasa 5,5 procenti qummut qaanngissanngikkaa Naalakkersuisut naatsorsuutigaat kisitsisillu inaarutaasut novembari naatinnagu nalunaarutigisinnaanerat ilimagalugu.
Allattoq Elisa Isaksen
oktobarip 15-at 2009 05:17

Karl Lyberthip Siumumeersup, paragraf 36 naapertorlugu apeqqutaanut Ineqarnermut Naalakkersuisup Jens B. Frederiksenip, akissuteqaataani tamanna atuarneqarsinnaavoq.

Ineqarnermut akiliutip qaffaatissaata siorna unitsinneqarsimanerata, kiisalu najugaqarfiit immikkoortoqarfiini arlaqartuni aserorterisarnerit, eqqagassanillu annertuumik ajornartorsiuteqarnerit, ineqarnemut akiliutit qaffanneqarnissaat pisariaqartunngortissimagaat, Jens B. Frederiksenip nassuiaatigaa.

Pisut marluusut taakku najugaqarfiit immikkoortoqarfiisa aningaasaqarniarnerat tatineqartikkaat, Jens B. Frederiksen allappoq.

Ineqarnermut akiliutigineqartussap aalajangersarneqartarnerani kisitseriaaseq tamakkiisoq aamma nalilersorneqarsimavoq, tamannalu allaffissornikkut oqimaatsuusoq naleqqutinngitsorlu isummerfigineqarsimalluni. Taamaammat ineqarnermut akiliutaasartut paasinarnerulersinnissaat sulissutigineqarpoq, aserfallatsaaliinissallu pisariaqartut ingerlanneqarnissaannut aningaasat pisariaqartut ilaatigut qulakkeerniarneqartut, Jens B. Frederiksenip Karl Lyberthimut Siumumeersumut akissuteqaatini naggaserpaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq