Indianapolisimi inuit arfineq-pingasut aallaasersortoqarnerani toqutaasut
USA-mi illoqarfissuarmi Indianapolisimi inuit arfineq-pingasunit ikinnerunngitsut sisamanngornermi unnoqisukkut aallaasersortoqarnerani toqutaapput.
Indianapolisimi politiit taama ilisimatitsisut, nutaarsiassaqartitsivik AFP allappoq.
Toqutaasut tamarmik assartuussileqatigiiffissuup assartugalerinermilu ataqatigiissaarileriffissuup FedExip illuutaata qanittuani nassaarineqarput. Illu taanna Indianapolisip mittarfissuata qanittuaniippoq.
Inuppaaluit aallaasersortup FedExip illuutaata eqqaani eqqaani eqqaqattaarnerani toqutaapput. Indianapolisimi politiit oqaaseqartartuat Genae Cook taama oqartoq, AFP allappoq.
Aallaasersortoq aallaasersoreerami imminorsimasoq, politiit ilisimatitsipput.
Aallaasersornerani toqutaasoqaannarani aamma ikiligaasorpaaloqarpoq. Ikiligaasut napparsimmaviliaanneqartut, politiit oqarput. Napparsimmaviliaanneqartulli qassiunersut ilisimatitsissutiginngilaat.
AAMMA ATUARUK Coloradomi inuit qulit pisiniarfissuarmi aallaasersortoqarnerani toqutaasut
Indianapolisimi aallaasersorneq USA-mi sapaatit akunnerini kingullerni aallaasernerpaalunni maannamut kingulliusoq, AFP allappoq.
USA-mi naalagaaffimmi Coloradomi illoqarfimmi Boulderimi inuit qulit pisiniarfissuup silaataani marsip naanerani aallaasersortoqarnerani toqutaapput.
USA-mi naalagaaffimmi illoqarfimmi Atlantami inuit arfineq-pingasut angutip aallaasersornerani tamatuma kingorna aamma toqutaapput.
USA-p sakkut pillugit inatsisaata sukannernerulernissaanut suliniuterpaaloqalertoq, præsident Joe Biden qaammammi uani siusinnerusukkut nalunaarpoq.
Suliniuterpaaluit taakku aallaasersortukinnerusoqartalerneranik kinguneqassasoq, taanna isumaqarpoq.
Bidenilli USA-p sakkut pillugit inatsisaanik sukannernerulersitserusunnera republikanerinit akerlerineqaqaaq.