Inatsit tunngaviusumut suleqatigiissitaliassaq kinguartinneqalerpoq

Tassami Inatsisit tunngaviusut qanorlu ilusillit eqqarsaatigineqarnersut suleqatigiissitamit ilaatigut qulaajarneqassanersut pillugit sukumiisumik nassuiaasiortoqaqqaartariaqaraluarmat.

Naalakkersuisut ullumi qanoq akissuteqarnissartik oqaaseqarfiginngilaat, Kalaallit Nunaat naalagaaffeqatigiinnermit avissaarniarluni Danmarkimullu attaveqaatinik kipisinissaminut alloriarujussuarnerarlugu, "maannakkut taamaliunngikkuttamit" Danmark-imi qisuariaaterpassuit tamatumunnga tunngassuteqarneranit pissutsit piviusut pingaaruteqarnerunerat, sapaatip akunnerani kingullermi Kuupik Kleist-ip Radioaviisimut naqissuserpaa.

- Siunnersuutigineqartummi marluusut tunngavigalugit Danmark-imiit avissaassanngilagut. Tamanna imminermini soqutiginaateqarpoq, Kuupik Kleist oqarpoq, nangillunilu oqaatigalugu siunissami Kalaallit Nunaata Danmark-llu akunnerminni attaveqaataat qanorluunnit ikkaluarpata taamaattoq Kalaallit Nunaata nunarsuarmiunik allanik suleqateqarnera annertusiartuinnarumaartoq.

Kalaallilli Nunaata tunngaviusumik inatsiseqalernissa pillugu naalakkersuisunngortut nutaat ersarissumik isumaqarput. Kissaateqarnersi ataqqivarput, kisianni naalagaaffeqatigiinnermut suli peqataaniarussi ingasattajaarussinissarsi mianersuutigisariaqarparsi, taama tasamanngaannit nalunaartoqarpoq.

- Kisiannili pineqartoq tassaavoq,  naalagaaffeqatigiinnerup iluani tunngaviusumik inatsiseqalernissap suliniutiginerani danskit naalakkersuisui mannakkorpiaq tapersersuimmata. Soorunami paasinarpoq, kisianni isumaqarpunga una suliassaq alloriarnerit arlaqartut atorlugit ingerlanneqartariaqartoq, taama oqarpoq Sara Olsvig sapaatip akunnerani kingullermi ministeriunerup Helle Thorning-Schmidt-ip Folketinge.-mi ammaalluni oqalugiareersorlu.

Aammattaaq taassuma suleqataata Kalaalit Nunaanni Naalakersuisut siulittaasuata oqaatigaa, tunngaviusumik inatsisissamut siunnersuut saqqummiunneqarnialerpat pissutsit piviusut allanngorsimaratarsinnaanerat. Allatut oqaatigalugu Kalaallit Nunaat Naaminersulersimanerminit  ullumikkorninngarnit siunissami pitsaanerusumik piareersimanerulluni inissisimalersimassaaq.

- Tassami Namminersornermut inatsit naapertorlugu, namminersortunnguvinnissaq inuiaqatigiit kalaallit aalajagingassaraat. Una inatsisinik tunngaviusunik suliaqarnissaq naalagaaffit allat misilittagaat qissimagaaraanni piffissaq sivisooq atorlugu ingerlanneqartussaagunarpoq. Aammalumi ukiut qulit 15-it imaluunnit 20-it qaangiuppata Kalaallit Nunaata sumi qanorlu inissisimanissaa eqqoriaruminaatsorujussuusoq, Kupik Kleist sapaatip akunnerani kingullermi Radioaviisimut oqarpoq.

Aammattaaq tunngaviusumik inatsissaq pillugu piareersaasumik isumalioqatigiissitamik pilersitsisoqarnissaanik  Siumup IA-llu kaammattuutaat ullumi Inatsisartuni nalunaaqutaq ataatsimut aallartittumik oqallisigineqassaaq.
Tunngaviusumik inatsit pillugu oqallinneq ullormut oqaluuserisassat aappaattut inissinneqarsimavoq.