Inatsit nutaaq eqquinerluppoq
Danmarkimi inatsisip nutaap ilaa, ilaqutariinnut meerartalinnut tapiissutisisinnaanermut tunngasoq, 2012-imi januaarip aallaqqaataani atuutilerpoq.
Inatsimmi nutaami maanna naalakkersuisut siuliisa akuersissutigisaani, malittarisassanik sukaterisoqarneratigut, Danmarkimut nuuttut tamarmik, ukiut qulit ingerlanerini sivikinnerpaamik ukiuni marlunni Danmarkimi najugaqareerunik aatsaat meeqqanut tapiissutinik tamakkiisumik pisinnaalerput.
Inatsit taanna najoqqutaralugu, kalaallit Danmarkimut nuuttut aamma eqqorneqarput. Naak kalaallit Danmarkimi naalagaaffimmi innuttaagaluartut.
- Inatsit taanna kalaallinut piffissap ilaani Danmarkimi najugaqarallartartunut, ingammik angajoqqaanut kisimiittunut eqquivoq. Taamaattumik isumaqarpunga tamatuma iluarsiivigineqarnissaa pingaaruteqartoq, kalaallit taamaalillutik qallunaanut innuttaasunut naligiissitaasinnaalerniassammata, qanoq sivisutigisumik Danmarkimiissimanertik apeqquttaatinnagu, Sara Olsvig oqarpoq.
Taassuma Danmarkimi naalagaaffimmut innuttaasut taama immikkortinneqarnerannut akileraartarnermut ministeri Thor Møger Pedersen qanoq isumaqarnersoq apeqquteqarfigaa.
Ministerip Sara Olsvigimut akissuteqarluni oqaatigaa, malittarisassat aaqqiivigineqarnissaat siunertaralugu, atorfilittaminut misissorteqqissaarniarini.