Inatsit nutaaq akuersissutigineqarmat akerliusoqarpoq
Aatsitassanut naalakkersuisoq Ove Karl Berthelsen oqarpoq inatsit nutaaq akuersissutigineqartariaqartoq, aatsitassanut oqartussaaaffik Nunatsinnit aappaagu januaarip aallaqqaataanit tiguneqartussaammat:
- Inatsit ukiuni 30-ni piareersarneqarsimasutut oqaatigisariaqarpoq. Namminersulereerattalu inatsisit tigusassat siullerpaatut pingaaruteqartutullu naalakkersuisuniit isigaarput. Taamaalilluta pisuussutitsinnik atuisinnaanermik akuersisinnaanermillu nammineq oqartussaanerput tamakkiisumik tigumminissaa pingaartikkatsigu ukiup aallaqqaataaninngaanniit, Ove Karl Berthelsen oqarpoq.
Peqatigiiffik 16. August, ujaqqerituut peqatigiiffiat Nuuk Stenklub, avatangiisit pillugit suliniaqatigiiffik Avataq, Earth Charter kiisalu Inuit Issittormiut Siunnersuisoqatigiiffiat ICC akerliussutsimik takutitsinermik aaqqissuisuupput.
Jens Mikkel Fly peqatigiiffik 16. Augustimeersoq inatsimmut nutaamut akerliunertik pillugu ima oqarpoq:
- Inatsit akuerineqarpat peqatigiiffiup tungaanniit isumaqarpugut innuttaasut pisinnaatitaaffii killeqartorujussuanngussasut. Ujaqqanik katersanik peqartut pinerluttunngortinniarneqassasut, Jens Mikkel Fly oqarpoq.
Akerliussutsimik takutitsisut ilaatigut oqariartuutigaat ujaqqat pinnersaasiassat aatsitassallu inatsimmi immikkoortinneqarnersut immikkoortinneqarsimannginnersulluunniit ersarluttoq, inatsilli nutaaq januaarip aallaqqaataaniit atuutilereerpat tamanna pillugu oqallittoqarsinnaasoq, Aatsitassanut naalakkersuisoq Ove Karl Berthelsen oqarpoq:
- Pinnersaasiassat sanalunneqarsinnaasullu maani nunaqavissunut salliutinneqarnissaat naalakkersuisuninngaanniit siunertariuarparput, qilanaaraarpullu akerliussutsimik takutitsisut oqaloqatigalugillu isumasioqatigissallugit. Qanoq iliornikkut aaqqiisoqarsinnaanissaa oqaloqatigissutigisinnaavarput inatsit tigoreerutsigu, Aatsitassanut naalakkersuisoq Ove Karl Berthelsen oqarpoq.
