Siumut: Inatsit imaannaq allanngortinneqarnavianngilaq
-Isumaqarpunga inatsit atuuttoq avatangiisinik, inuiaqatigiinnik pisuussutitsinnillu innarliinissamik illersuisuusoq tunngavigissallugu pingaarnerpaasoq, Karl-Kristian Kruse taama oqarpoq.
Allaffissornikkut qinnuteqaatit piumasaqaatillu inatsisit malilllugit naammassiniarlugit naalakkersuisoqarfiit qinnuteqartullu akunnerminni attaveqaqatigiinnerisa pitsaanerusinnaaneranik tikkuaaneq tunngavissaqarnersoq misissoqqissaagassaassasoq erseqqissaatigaa.
AAMMA ATUARUK Aatsitassarsiornermi piumasaqaatit sakkukillisissigit
Nunatsinni aatsitassarsiorniartunut suliarinneqqaarfinnik pilersitsinissamik piumasaqaateqartarneq tamatigut naapertuuttuaannanngitsoq Kiista P. Isaksenip siunnersuuteqarnermini tikkuarpaa. Karl-Kristian Kruse tamatumunnga tunuarsimaarpoq:
-Kisianni aatsitassarsiorneq kujataani suli aallartinngitsoq inatsisinik allanngortiterisoqaqattaassappat qinnuteqaatinik nalilersuinerit nutaamik ingerlanneqartariaqalissapput. Suliarinneqqaarfinnut tunngatillugu Inatsisartunngortumaartussat nalilersoqqissaassagaat qularinngilara.
Taamatuttaaq erseqqissaatigaa aatsitassarsiornermi nunatta annertunerpaamik aningaasatigut pissarsiaqarnissaa Siumup anguniagarigaa. Kujataani aatsitassarsiorniarlutik qinnuteqarsimasut, soorlu qinnuteqaataasa sivisuallaamik suliarineqarnerat, allaallu ingerlatseqatigiiffinnik immikkoortitsisoqarnera takusinnaallugu Kommune Kujallermi borgmesterip uparuagaasa ilagaat, inatsilli malinneqartariaqartoq partiip siulittaasuata tullia isumaqarpoq.
