Inatsisitigut ataataqanngitsut nuannaarnissartik utaqqikkallarpaat
Inatsisitigut ataataqanngitsut kalaallit amerlangaatsiartorsuit pillugit maanna Lars Løkke Rasmussenip misissortilerpaa, suna tunuliaqutigalugu inatsit maanna atuuttoq sooq atuuttuunersoq. Ministeriuneq taama nalunaarpoq Skagenimi Naalagaaffeqatigiit naapeqatigiinneranni.
Lars Løkke Rasmussenip taama nalunaarnera qaqugorsuarmut eqqaamaneqarumaartoq Naalakkersuisut siulittaasuata Kuupik Kleistip nalilerpaa, tassami Danmarkimi naalakkersuisuusarsimasut tamanna pillugu paasiniaarusuttarsimanngimmata.
- Siumoortumik nuannaanngilaarallarta, Tida Ravn oqarpoq.
- Nuannaarneq killeqarpoq, tassami 2003-mili taamani inatsisit atortinneqarnerannut ministerip, Lene Espersenip neriorsuutaa suli ulloq manna tikillugu naammassineqanngimmat. Massakkut neriorsuutip naammassineqarnissaa takoqqaarlugu nuannaalerumaarpugut.
Tida Ravnip malugeqquaa, misissuinissap qulaajaannassagaa, sooq inatsit pilersinneqarsimanersoq. Tamaaliortoqanngippat inatsisip qangarnisap allanngortinneqarani atuutsinneqaqqilersinnaanera ernumanartoqartikkamiuk aammalu siunissaq kisiat isigalugu atuuttuutinneqalissammat, pisimasut eqqarsaatiginagit.
- Assersuutaalluarpoq inatsisitigut ataataqanngitsut ilaat maanna toqukkut qimagutereermata. Taakku kiguaavisa ilisimasariaqarpaat angajoqqaamik kikkut ilaqutarineraat, Tida Ravn isumaqarpoq.
- Inatsisit uku pioreersut misissorneqarnissaat nuannaarutigaarput. Soqutiginartua uaniippoq, sooq uagut inatsisitigut illersorneqannginnerput paasiniarneqassasoq. Suliaq tamaanga killeqartariaqarpoq suliarlu aallartinneqarluni, Tida Ravn oqarpoq.
Nuummi juunip 30-ani pisussami, Inatsisitigut ataataqanngitsut ataatsimeersuarnerminni peqatigiiffik pilersissavaat. Tida Ravnip neriuutigaa, tamatuma kingorna oqartussaasut paasiniaanerminni peqatigiiffik suleqatigissagaat.
