Inatsisitigut ataataqanngitsut nangaasunnguamik nuannaarput

Taakku paasiniassavaat 1963 sioqqullugu meeqqat uersakkat inissisimanerannut tunuliaqutaasunik paasiniaassallutik. Suliaat aappaagu juunimi naammassereersimassaaq.

- Naalagaaffeqatigiinnerup iluani qullersat tamanna pingaaruteqartutut nalilersimappassut nuaannaarutaavoq, Inatsisitigut ataatanngitsut peqatigiiffianni siulittaasoq, Tida Ravn, oqarpoq nangillunilu:

- Nuannaarutissaavoq politikkikkut sumulluunniit attuumassuteqanngitsunik ataatsimiititaliaq inuttaqarmat, nuannaarutiginerpavarali kalaallimik ilaasortaqarmat.

Inatsisitigut Ataataqanngitsut kissaatigigaluarpaat, Ataatsimiititaliarsuup pilersinneqarnerani ataatsimiititaliami malinnaatinneqarnissartik:

- Inunnut ataasiakkaanut paasissutissat isertuunneqartariaqartut kattuffiliorattali ilisimalersimavagut, taamaattumik ataatsimiititaliami peqataanitsigut tamakku iluaqutigineqakutsoorsinnaagaluarput, Tida Ravn oqarpoq.

Inatsisitigut ataataqanngitsut peqatigiiffiat pilersinneqarmalli politikerit sulillutik aallartipput, tassalu maanna killifigalugu, danskit inatsisit atortinneqarneranut ministerip suliakkiinera. Tida Ravnip maanna killiffik nuannaarutigaa:

- Suliassaq pisariaqavippoq. Uaguinnaanngimmatami qulaajaaffigineqarnissaminnik pisariaqartitsisut, soorlu innarluutillit, parnaarussat aamma meerarsianngortinneqarsimasut. Oqaluttuarisaanitsinni aatsaat siullermeersumik immikkoortinneqarsimanitsinnik qulaajaanerit aallartimmata nuannaarutigigaluarparput, Tida Ravn naggasiivoq.

Ataatsimiititaliap suliaa saqqummersinneqaruni nassuiaataat ikinnerpaamik 60-nik qupperneqartussaavoq.