Inatsisitigut ataataqanngitsunik toqqaannanngikkaluamik assigiinngisitsineq ministerip nassuerutigaa
Inatsisip allanngortinneqarnissaanik siunnersuutaasup malitsigisaanik assigiinngisitsinermik nutaamik pilertoqassasoq maanna paasivarput. Taamaammat suliaq Inatsisartunut saqqummiunneqarpat Inatsisinut ataatsimiititaliami suliarineqarnissaa sulissutigissavara, taamaaliornikkut allannguutissatut siunnersuutaasinnaasunik misissuisinnaaniassagatta taamaaliornikkullu assigiinngisitsineq nutaaq pinngitsoortillutigu, Sara Olsvig oqarpoq.
Danskit isumaginninnermut ministeriata akissutaa naapertorlugu, inatsisip allanngortinneqarnissaanik siunnersuutissamut missingiut Naalakkersuisnut saqqummiunneqareerpoq. Taamaammat Naalakkersuisut Inatsisartut ukiakkut ataatsimiinneranni siunnersuummik saqqummiussinissaat naatsorsuutigineqarpoq.
Sara Olsvig maanna Folketingimi isumaginninnermi ministerimut §20-nik pingasunik apeqquteqaqqissimavoq. Apeqqummini ministeri qinnuigaa erseqqissaaqqullugu inatsisitigut ataataqanngitsut ataataminnik toqusooreersimasut kingornussassartaanillu inaarinnittoqareersimatillugu assigiinngitsinermik pineqartussaanerat isumaqataaffiginerlugu, inatsimmi tamanna taaneqanngippat. Aammattaaq ministeri qinnuigaa qallunaat naalagaaffiannit kingornussassaraluanik annaasanik taarsiisoqarsinnaanera qanoq isigineqarumaassanersoq akeqqullugu.
Danskillu isumaginninnermut ministeriat Karen Hækkerup ima akissuteqarpoq:
- Namminersorlutik Oqartussat peqqusinerisigut, Kalaallit Nunaanni inatsisitigut ataataqanngitsut inatsisitigut inissisimanerinut pitsanngorsaataasussamik inatsisissatut siunnersuutissamut missingiummik suliaqarpunga. Missingiutip assilinera ilanngullugu nassiuppara.
Inatsisissamut siunnersuutikkut qitornat taakku - maanna inersimasunngoreersimasut - kina ataatarinerlugu paasisaqarnissaminnut periarfissinneqassapput. Malittarisassatut siunnersuutigineqartuni, ataataassutsimut tunngatillugu inatsisitigut sunniutaasussat meeqqat pillugit Kalaallit Nunaanni inatsimmi aalajangersarneqartut assigissavaat, tassunga ilanngullugit ataatamit ilaqutaanillu kingornussisinnaatitaaneq.
- Inatsisissatut siunnersuummut missingiut kalaallit naalakkersuisuinut saqqummiutereerpara, taamaammat sukumiinerusumik oqaaseqarfiginissaa maannakkorpiaq tulluarsorinngilara. Folketingimi Kalaallit Nunaat pillugu ataatsimiititaliap suliamik soqutiginnittupilussuunera ilisimavara, aamma qanoq ingerlariaqqittoqarneranik ataatsimiititaliaq ilisimatikkumaarpara, danskit isumaginninnermut ministeriat, Karen Hækkerup, Sara Olsvigimut apeqquteqaataanut akissuteqarluni ilaatigut taamatut allappoq.
