KANUKOKA: Inatsisip nutaap kommunit unammisilissavai
Naalakkersuisut kommuninut toqqaannartumik isumaqatiginninniartalerniarput, KANUKOKA-lu inatsisissami nutaami, kommuninut inatsisitigut sinaakkusiisussami, taaneqanngiivilluni.
Tamannalu kingunerlutsitsisinnaasoq KANUKOKA-p siulittaasua isumaqarpoq.
- Ernummatigisarput annerpaaq unaavoq, kommunit immitsinnut unammisussatut maannakkut inissinneqartussanngussagatta. Taannalu soorunami ajorluinnaqqissaartumik kinguneqarsinnaasutut isigivarput, KANUKOKA-p siulittaasua, Simon Simonsen oqarpoq.
Kommunit sulisuinut nalinginnaasumik aningaasarsiatigut, atorfimmi atukkatigut soraarnerussutisiassaqartitaanikkullu atugassarititaasut pillugit aalajangersakkat Naalakkersuisut kommunillu isumaqatigiissuteqarnerisigut aalajangersarneqartalissasut, Naalakkersuisut siunnersuuteqarnerat Simon Simonsenip innersuussutigaa.
- Tassani eqqarsaatigalugu kommunit pissakinnerusut kommuninut pissaqarnerusunut siunissami ajoraluartumik unammillernissaminnut periarfissakitsuararsuussapput, Simon Simonsen oqarpoq.
Unammisitsissanngitsoq
Naalakkersuisulli KANUKOKA-mut isumaqatiginninniartarunnaarpata, kommunit imminnut unammillernissaannut pissutissaqarsorinagu naalakkersuisup, Erik Jensenip siunnersuutip Inatsisartunit tallimanngornermi oqaluuserineqarnerani oqaatigaa.
- Novembarip 17-iani 2016-imi isumaqatigiissuteqartoqarnikuuvoq, tassanilu aamma kommuninit, KANUKOKA-mit kiisalu Naalakkersuisuninngaanniit atsiukkamik malitseqartinneqarpoq. Tassanilu aamma isumaqatiginniarnermi kommunit Naalakkersuisullu aallartitaqartarput, isumaqatiginninniarnernilu anguniarneqartarluni, tamarmik assigiimmik, isumaqatigiissutit aallaavigalugit akissaatitigut aaqqiisoqarsinnaanissaa, Erik Jensen oqarpoq.
KANUKOKA-p siunissaa nalorninartoq
Kommuneqarfik Sermersuup kommunit kattuffiannut ukiuni marlungajanni ilaasortaannginnera pissutigalugu allannguinissamik siunnersuuteqarlutik Naalakkersuisut allapput.
Inatsisissatullu siunnersuut, KANUKOKA-mik taasaqanngitsoq, akuersissutigineqassappat, kattuffik atuutiinnarsinnaanersoq pillugu aperineqarami, Simon Simonsen ima akivoq.
- Taanna soorunami ernumanarsinnaavoq, KANUKOKA-p siulittaasua, Simon Simonsen oqarpoq, kattuffiullu februaarimi ataatsimeersuareerpat, tamanna paasinarsiumaartoq oqaatigalugu.